Jisálamu 66 - O Mikanda Ikola

Mibhaku Ia Kusakidila

Ua Mesene Ngimba. Muimbu, mukumbi.

¹ Kolenu, mu kuximana Nzambi, enu mu jixi joso;

² Imbenu, mu ku tumbula o dijina diê; tumbulenu o fuma iê.

³ Ambelenu Nzambi: Eie Ngana u kindanda mu kukalakala kué! mukonda dia nguzu ié iavulu, jinguma jé ja-nda kuiza ku ku belesela.

⁴ Jixi joso ji kala mu ku ku bheza eie, ni ku ku imbila; ji kala mu kuimbila o dijina dié. (Selah.)

⁵ Zenu, mu tale o ikalakalu ia Nzambi; muene kilamba mu kutumina anʼathu!

⁶ O kizanga kia kalunga, ua ki kitula mavu a hatu; ni honga ia menha, athu a i zaúka muene bhoxi dia kukuta; bhenhobho tua sanguluka mukonda dié.

⁷ Muene, mukonda dia kutena kuê, ungana uê u nangenena; o mesuʼê ala mu langa ifuẋi; né edi a kituka ka tena. (Selah.)

⁸ Tumbulenu Nzambi ietu, enu ifuẋi ioso, dízui di suine dia ku mu ximana.

⁹ Ua tena ku tu bhaka tu athu ku muenhu, iu ua kambe kuehela inama ietu kuẋangumuka.

¹⁰ Kuma eie, u Nzambi, ua tu bhitisa hanji ku polova; ua tu kenzulula kala kiene kubhanga o phalata mu túbhia.

¹¹ Eie ua tu fuisa hanji mu uanda; a tu tele muene mikolo mu mbunda.

¹² Kifua ua tu vundile hanji bhoxi, athu iá a tu bhita jinga ku thandu ni ku tu titidila; ni mu túbhia ni mu menha tua bhiti-mu; maji o ku pholo kunu, ua tu bheka dingi bhu kididi kia vulu o jimbote.

¹³ O ki ngalʼiki, ngi bhixila mʼonzo ié ni jisata ja kuoha; ngi bhana muene kioso ki nga di hambelela kokué.

¹⁴ Kioso ki nga tangele ni mizumbu iami, kioso kia zuela o dikanu diami, bhu kíbhidi bhu nga kexile.

¹⁵ Ngi bhakula kokué, jisata ja kuoha ja ibhaku ianete, kumoxi ni dizumba diambote dia ilumbe ia jimbudi; ngi bhana muene ni jingombe ni jihombo. (Selah.)

¹⁶ Zenu, mu ivue, enu oso muene mu ẋila Nzambi, ngi mi jimbuile kioso muene, kia bhanga, mù kudila o muenhu uami.

¹⁷ Ngi dikola kua muene ni dikanu diami, O dimi diami di kala mu ku mu zangeleka.

¹⁸ Se ku muẋima nga solele kubhengalala, Ngana hinu ka xikina ku ngʼivua.

¹⁹ Maji, ni kidi kiene, Nzambi phe ua ngʼivu muene; ua ngi suu o dízui diami dia kusamba.

²⁰ Nzambi nga mu sakidila, ua kambe ku di tuna o musambu uami! A tane-ku! ua kambe ku ngi katula o kulenduka kuê.