Jisálamu 64 - O Mikanda Ikola

O Ku Tu Xitila Ku Jinguma

Ua Mesene Ngimba. Mukumbi ua Davidi.

¹ Ivua dízui diami, Ngana Nzambi, tata, ki ngala ku di tenda! Kondeka o muenhu uami, kuma ngala ni hele ia jinguma.

² Ngi sueke, mukonda dia ikutu ia athu aiibha, ni mukonda dia ibulukutu ia akua kubhanga ikuma;

³ A bhingi dimi diâ a di zuika kala xibhata, a ku ona o milonga ialulu kala matoma.

⁴ A batamena mukuá ua kambe o kikuma; mukuetu, u tukumuka a mu ase kiá, ni uoma ngó kala na-u.

⁵ A di suinisa mudiâ, mu bhanga ndunge jaiibha; a ta maka ma kuta míkala mu fua akuá; a fika ki kuala muthu ua a mono, kuma ela muene, exi: Nanhi u tu mona?

⁶ A funha milonga, exi ndunge iambote; o mixima iâ, ni ilunji iâ, ia di bhange muene kala dikenhe dia usuéia.

⁷ Nzambi phe hinu u a asa ene; hinu a tukumuka musongo uê ua a kuata kiá!

⁸ Hinu-phe u a mona kia di bhukana, kuma o dimi diâ ene dia kà a bheka mu kusekala; oso a kà ki mona ni mesu, a kà lenga.

⁹ Kia kà bhangesa athu oso kukala ni uoma, hé a kà tumbula o kukalakala kua Nzambi; a kà xala muene ni kuxinganeka o ikalakalu iê ni kilunji.

¹⁰ Athu aiuka-phe a kà tanena mua Jihova, kuma a kondamena mua muene; oso emana muẋima nzanza, a kà di ta thâthe.