Jisálamu 63 - O Mikanda Ikola

O Kusota Jinga Nzambi

Mukumbi ua Davidi, kioso kiala mu kikangalakata kia Juda.

¹ Ngana Nzambi, tata, eie u Nzambi iami; eme ngi di meneka muene mu ku ku sota; muẋima uami ua ku kala ni dinhota; oʼxitu jami ja ku kala ni hânji iavulu, mu ixi iakukuta, iabhuila, iedi ni iene thokon! mua bhingi ki mu moneka menha.

² Phala kutongolola o kukula kué ni kuuabha kué, kala ki nga ku mono mu tembulu ié.

³ Kuma o henda ié kota, muenhu ndenge; kiene mizumbu iami ki i ku ximanena.

⁴ Kienhiki, ngi ku tumbula katé bhua suka o muenhu uami; ngi kala jinga mu leka o makuʼami mu dijina dié.

⁵ Muẋima uami u ikuta jinga kala ngadi xitu ianete ni uôngo; dikanu diami di ku ximana ni mizumbu ia ngalasa,

⁶ Kioso ki ngi ku ta muẋima, bhu hama iami bhu nga zeka ngi kala mu ku ku xinganeka, ki ngi tona mu ithangana ia usuku.

⁷ Mbata eie-muène u dikuatekesu diami, o mu kilembeketa kia mabhabha mé, muene mu ngi suamena, anga ngi kala mu kuimba mimbu ia ngalasa.

⁸ Muẋima uami ua ku nhenganana muene; o lukuaku lué lua dilu, luene lua ngi fikidila.

⁹ Enhó-phe, oso ala ku ngi séia, phala muenhu uami u di bote, a kà di bota ene mu bombo dia kalunga.

¹⁰ A kà diua muene ku mazu a xibhata, o isasu iâ ia kà kala huta ia jimbulu.

¹¹ Maji o muenexi-phe, u kala mu tanena kua Nzambi; kuma oso a di tuma ni muene, a lúnga; o dikanu-phe dia iá a tanga makutu, hádia di bhinga a kà di xita muene.