Jisálamu 62 - O Mikanda Ikola

Nzambi Kene Mu Tobhesa Muthu

Ua Mesene Ngimba; utelu ua Jedutunu. Mukumbi ua Davidi.

¹ Kidi kiene! muẋima uami ua ximbakata mu kinga Nzambi; kua muene ngó ku ngi tundila o kubhanduluka.

² Nzambi muene ngó o ditadi diami di ngi bhana muenhu; kua muene ku nga kondamena, ka ngi zambesa kiavulu, kana!

³ Mbambe bhebhi, enu mala, bhu mua kà suka ni kukanena mukuenu ku mu bhanga phulu? Mua kà buila-phe enʼuenu oso; muedi kala phalelu ia bongola, mukuâ ni kimbaka kia-lu sota kutenuka.

⁴ Ene a-lu di longesa mudiâ phala kulundumuna o muthu uangene bhu ditala diê dia ujitu; kia a uabhela o makutu; a hanza muene ni dikanu diâ maji o ku muẋima moxi-phe akua mázui. (Selah.)

⁵ Muẋima uami di xibhié, u kinge ngó Nzambi; mukonda kudielela kuami ku tunda ngó kua muene!

⁶ Muene ngó o ditadi diami di ngi lengela; muene kubhuluka kuami; kua muene ku nga kondamena, ka ngi zambesa, kana!

⁷ Kua Nzambi kuene kua ngi kala o kulaia, ni kudisanza, ni kijingo; o ditadi diami dia nguzu, ni dilengelu diami, kuene kua Nzambi.

⁸ Enu mu mundu, di fiiadienu Nzambi mu thembu joso; lundululenu o mixima ienu kua muene; kuma Nzambi muene dilengelu dietu. (Selah.)

⁹ Mukonda, ni kidi kiene, akua ditala diófele kingoho, o akua ditala dia dikota ue makutu; ku a ta ku pezo, ki bhuala ua di tungula, ene oso a bhebhuluka mukuâ ni ukumbu ngó!

¹⁰ Kana ku di fiiala ungúngu, mba u kala mu ku ta thathe ni jimbongo ja kubhûnda; ku fike kuila u di bhanga ni uii; jimbongo se ji di vuala, ku ji dielele; katula-ku muene o muẋima ué.

¹¹ Nzambi ua zuela kima kimoxi; eme nga kʼivu muene luiadi: Kuma o kutena kua ngene kua Nzambi.

¹² Ni kulenduka kua ku tokala, eie Ngana; kuma eie-muène u vutuila o muthu kala kioso kia fuama mu kukalakala kuê.