Jisálamu 60 - O Mikanda Ikola

Musambu Mu Izuua Ia Ita.

Ua Mesene Ngimba; mbimbi Ié ia Kitulu kia kijila. Mixami ia Davidi, ia kulonga; kia kexe mu kúlua ni Alamenahalaimi ni Alame-zoba, Jouabe anga u vutuka u beta ku akua Edomo Kuinhi dia midi ni midi jiiadi, mu Dikôlo dia Môngua.

¹ Ngana Nzambi, eie ua tu ambudisa, ua tu muange; eie ua tu luualela, tua diondo tu kudile!

² Ixi ua i teketesa, ua i tandujula; saka, Ngana, o misula iê, kuma hanji iii tunguta.

³ O mundu ué ua a talesa hadi; ua tu nuisa vinhu ia kubhendujuka.

⁴ Akua uoma ué eie ua a bhana dibandela, maji a a bhesa lusolo kuala akua mifula. (Selah.)

⁵ Mukonda a nʼé a jihenda a bhingi ku a bhandulula, eie-phe itaié ni lukuaku lué lua dilu, u tu bhulule.

⁶ Nzambi ua zuela mu kuzela kuê kukola, uixi; Eme ngi tana-ku; o ixi ia Xikeme ngi i uana, o mukáu ua Sukote ngi u zonga mu jimbambe.

⁷ Ngileiade uami eme, Manasa ue uami; Ifalaíme kijinga kiami kia mútue; o Juda muene mbasá iami ià ungana.

⁸ Mouabhe kitutu kiami kia kusukuila inama; Edomo nga mu takuila o sabhatu iami; Fidíxia nga mu tolola, ngi kola kikóue.

⁹ Kilolo nanhi, u ngi bheka mu mbonge iakolo? Nanhi u ngi songuela mu kuia ku Edomo?

¹⁰ Kifua kʼeie muène, ua tu ambudisa, Ngana Nzambi? Kʼeie-muène Ngana Nzambi, ua mu fula kiá kubheka o ifuẋi ietu ku ita?

¹¹ Tu bande, Ngana, phala tu lende jinguma; kuma o ku di banda kua athu kingoho.

¹² Mu nguzu ia Nzambi tu bhanga muene undanda; kuma muene u titidila o jinguma jetu bhoxi.