Jisálamu 6 - O Mikanda Ikola

Musambu ua Muthu ua kate kiavulu

Ua Mesene Ngimba: ua kuxikila ku jimbànza ja jingoji. Mbimbi iê ia Xemenita. Mukumbi ua Davidi.

¹ Jihova, tata! kana ku ngi bazela ni njinda, kana ku ngi beta ni kuthathamana kué.

² Ngi kuatele henda, u Jihova, kuma nga bhele, nga xoueta; u Jihova, ngi sake; kuma ngala kukata katé ni mu ifuba.

³ Ni ku muẋima moxi nga bhondalala ni lamba; eie-phe, u Jihova, tata, mbámbe bhebhi bhu u suka ni kungʼehelela kiki?

⁴ Bhomba muẋima, Jihova, u ngi kudile muenhu uami; ngi bhulule, nga ku diondo mu henda ié.

⁵ Kuma mu kúfua ki muala dingi ku ku xinganeka; kuʼalunga, nanhi dingi u tena ku ku sakidila?

⁶ Nga bhuila kiá mukonda dia kukema kuami! Usuku ni usuku hama iami ngi i betesa; ila muene kiololo ni masoxi!

⁷ Mesuʼami iá a bhua-bhu kiá ni kudila; kala kumona dingi kiambote, mukonda dia jinguma ku ngi tatesa.

⁸ Tundenu bhu mbandu iami, enu oso mu ati a ituxi; kuma Jihova ua ngʼivu kiá dízui diami dia kudila.

⁹ Jihova ua ngʼivu kiá o kudionda kuami; Jihova ua xikina o musambu uami.

¹⁰ Jinguma jami joso a-nda kudiuana, sonhi ja-nda ku a kuata; kindala a-nda kuvutuka ni dima, anga a kotokela ni jisonhi, ka-nda kumona kuoso kua di tela.