Jisálamu 59 - O Mikanda Ikola

Kusamba Mukonda dia Jinguma Ja Suína, Ja Hamena Manhinga

Ua Mesene Ngimba; mbimbi iê ia kuila Ku i zange. Mukumbi ua Davidi. Mixami; kia tumu Saulo ku mu batamena bhu kanga diê, phala ku mu jibha.

¹ Ngi kudile ku jinguma jami, eie u Nzambi iami! ngi bhake ditala dia di leka, mukonda dia athu ala ku ngi sota.

² Ngi kudile kua ió a kalakala lusebu, ngi bhulule ku iluami ia hamena manhinga.

³ Kuma ia-ue-iá, a ngi batamena ni ku ngi tela mibhetu; iiala ia nguzu ia di bande mu ku ngi kuata; sè kituxi kiami, mba mulonga, eie u Jihova, tata!

⁴ A di iudika muene, hé a lenga mu ku ngi kuata, eme muene ki nga bhange ngó kiaiibha. Phaphumuka! Ngana, u ngi sange, phala u ki mone.

⁵ Eie muene nga ku indi, u Jihova dia ifuẋi, u Nzambi ia Izalaiele, balumuka mu bhesa o matumbu kaxtiku; kana ku a lendukila, né umoxi ngó kuma enhó a bhukumuka kiluelu kiâ ni kubhanga kiaiibha. (Selah.)

⁶ Mu ngoloxi joso eza, enda ni kubuza kala jímbua, a kuata kunhunga muʼnzunga ja sanzala.

⁷ Tongolola-kiu, kuma mu kanu diâ mu tunda ima iaiibha, o ku mizumbu iâ kua xikama ngó jindaka; kuma amba, exi: Nanhi muene u tu ívua.

⁸ Maji eie-phe, u Jihova, ua-nda ku a olela; akua mahanha ió, eie u a tobhesa.

⁹ Mukonda eie u nguzu iami, eme ngi ku suua eie; kuma eie u Nzambi, eie u ditala diami dia kulengela.

¹⁰ Nzambi iami u ngi sanga ni kulenduka kué; u ngi bhanga jivondadi kua ió jinguma jami ala ku ngi séia.

¹¹ Kana ku a jibha, sumba mundu uami a jimba-ku; enda ni ku a kaia ni kifuxi kié, a kale mu bungajana; eie Ngana u kala u ngubu ietu.

¹² Mukonda dia kituxi kia dikanu diâ, ni maka ma mizumbu iâ, afue-phe mu uanda ua kubhuma kuâ; mukonda dia jindaka jâ ni makutu ene mu zuela.

¹³ A buidise ni njinda ié, a buidise muene ki ku subhuke muthu; phala a kʼijiie kuma sai-ku Nzambi u tumina mua Jakobo, u tumina muene katé ku maẋokololo a jixi. (Selah.)

¹⁴ Eze dingi mu ngoloxi, ende ni kubuza kala jímbua, a kuate kunhunga mu nzunga ja sanzala.

¹⁵ Ende ni kubungana mu sota kúdia, hé a zeka ngó bhu kanga, mukonda kúdia ka ku mono.

¹⁶ Eme-phe ngi ku imbila mukonda dia nguzu ié iavulu; ngi suína dízui mu kimene, mu tumbula o kiadi kié ni kusanguluka; kuma eie Ngana u ditala diami dia di leka, u kididi kiami kia kulengela bhu kizuua kia kutata kuami!

¹⁷ Eie, Ngana, hinu ngi ku ta ku mukumbi, eie u Nguzu iami; kuma Nzambi muene o ditala diami dia kulengela, muene Nzambi iami ia jihenda.