Jisálamu 58 - O Mikanda Ikola

Afundixi a Mu Bhanga o Usuéia

Ua Mesene Ngimba; mbimbi iê ia kuila Ku i zange. Mukumbi ua Davidi. Mixami.

¹ Kífua mua zuela, kidi, enu mu afundixi? Muala kufundisa kiambote anʼathu mu ngongo?

² Kana, ku mixima ienu kuala ndunge ja mangonha; mu ngongo maku enu ezalesa-mu ni kusuína ni kubhûnda.

³ Mukonda akua kubhuma, a dianguka tunde mu mala; a zubha ngó ku a vuala, njila a i xi kiá a kuata kiá kutanga o makutu.

⁴ Ala ni ikolakola ia di fu ni ia nhoka; mukuâ ni diuta dia muxilu, diala ni mátui ma xiti,

⁵ Phala di lémbue kuívua o dízui dia nganga, ka tena ku mu bhuuika, né o nganga ua te-bbhu muene umesene!

⁶ A bukule mazu mu kanu, Ngana Nzambi; a vuze o imazu ia jihoje, eie Ngana, u Jihova.

⁷ A bhite kindala kala hungulule ia menhʼa mvula; o ki ela asa athu, o matoma mâ ma bukujuke.

⁸ Kala huelendende, u jila ni kubotomoka, ene uâ a di bhange kiòmuene; ele kala mùselu a mu vuala, o muanha ka u mono dingi.

⁹ A kituke kala minha ia te bhu jiku, jímbia kiluua ngó jivua o munza, muene ua i muanga-muanga kiá ni kitaphephe, ni iauisu ni iauama.

¹⁰ Uaiuka-phe hinu u ki sakidila, kia mona o kaxtiku kâ; hé u sukula o inama iê mu manhinga ma isuéia.

¹¹ Bhenhobho athu a kèla, kuma: Kidi muene, sai dilau dia xikamena muthu uaiuka. Mbé kidi muene, sai-ku Nzambi mukua kubatula o milonga mu ngongo.