Jisálamu 56 - O Mikanda Ikola

Kudielela Nzambi Mu Izuididiku

Ua Mesene Ngimba; mbimbi iê ia Diembe mu kisasa. Mukumbi ua Davidi. Mixami; kia mu kuata akua Fídixia mu Ngate.

¹ Ngi kuatele henda, Ngana Nzambi, kuma o muthu mu ngongo ua mesena ku ngi dia; kumbi dioso dia kambàmba iá bhânga mu ku ngi xinina bhoxi.

² Enhó a mu ngi kanena ithangana ioso, a bhindamena muene ku ngi dia; mbata avulu muene ala ku ngi sota ni mahanha phala ku ngi lua.

³ Mu kithangana kioso-kioso-phe ki ngiza o uoma, ngi dielela ku lengela ko kué, u Sukè-ku.

⁴ Kua Nzambi, kuene ku ngi tunda o kulúnga, kua Nzambi, kuene, ku nga dielela; ki ngi kala dingi ni uoma. Hé kima, xitu i tena ku ngi bhangaʼhi?

⁵ Izuua ioso ala kubhengeleka o izuelu iami; ixingakenu iâ ioso ia ku ngi bhanga phulu.

⁶ A ta kikutu mudiâ, a ngi batamena, aia ni ku ngi tola mu manhanhu, ala ku ngi seia muene phala ku ngi jibha.

⁷ Kifua mu ufe kala iú, muene mua-ndu bhandulukila ene? kifuẋi kienokio, a bhane kibhalu, Ngana Nzambi, ni njinda ié.

⁸ Inhunginu iami ioso eie uaʼijiia: o masoxi mami moso, eie ua a bhake mu kisudi kié; manhi, ni mu divulu dié, kua a soneka-mu?

⁹ Kioso eme ki ngi di kola kokué, jinguma jami kiene ki ji vutuka ku dima; mukonda nga kʼijiia kiambote, kuma eie Nzambi uala ku mbandu iami.

¹⁰ Kua Nzambi kuene ku ngi tunda o kulunga, kua Jihova kuene ku ngi tunda o kulunga,

¹¹ Kua Nzambi kuene ku ngi dielela, ki ngi kala dingi ni uôma. Hé kima, muthu u tena ku ngi bhanga-hi?

¹² Ioso i nga di hambelela ko kué, Ngana Nzambi, eme nga-nda ku i kumbidila muene; ngi ku bhakuila ni maujitu ma kusakidila.

¹³ Kuma eie ua ngi kula o muenhu uami kuʼalunga; ua fudisa inama iami kuẋangumuka, phala ngiie ni kuenda bhu pholo ia Nzambi mu muanha uazele ua athu a muenhu.