Jisálamu 55 - O Mikanda Ikola

O Makamba A Mangonha

Ua Mesene Ngimba; ua kuxikila ku jimbanza ja jingoji. Maxikile a Davidi.

¹ Bhana dítui, u ivue o musambu uami, Ngana Nzambi; kana kubhengalala pholo kioso ki ngala kudikola.

² Ngi suue, Ngana, u ngi vutuile; nga juuala ni ku di tenda ni kukema.

³ Mukonda dia mitendu ia ku di kola-kola kua nguma, mukonda dia kíbhidi bhua ngi bhake, o kisuéia; mbata ala ku ngʼona milonga, ala ku ngi zukutisa ni njinda.

⁴ Muẋima moxi uala ku ngi titila kiavulu, kekénha ia kalunga ia ngi kuata!

⁵ Kua ngʼiza kubhuuama ni kuteketa, nga bhondalala ni kikote!

⁶ Ngixi-phe: Tamano nga kexile ni mabhabha kala diembe! Ngeje dkutuka mu sota kididi kiami kia kunhohena.

⁷ Ngeje kulengela muene ku makanga, hé ngi iudika o fundu iami ku matutu.

⁸ Kindala muene ngeje kulenga kavuanza kâ; anga ngi kala kididi kia kondama, katé bhuoso bhua kà bhitila mvula ia kibhungu.

⁹ A muange, Ngana, u juualese madimi mâ; kuma mu mbongeʼumu nga mono-mo kusuína kuavulu, ni ku di kuata-kuata jimvunda.

¹⁰ Usuku ni muanha ala kunhunga-nhunga ku thandu dia kimbaka; dibhata dia tungu kiavulu ungulungumba ni ituxi;

¹¹ U sanga muala usuéia uoso; o mu nzunga iâ nuka mu kamba mauiii ni makutu.

¹² Mukonda ua ngi nongena ki nguma iami, kana; se kuila nguma, kimuua, ngeje kusoka na-kiu; o ua ngi zembe ue ki muene ua di kaka ni ku ngi bhanga o phulu; se kuila muene, ngeje ku mu ebha, hé ngi suama.

¹³ Ki bhinga eie u soko diami ua ki bhange, u kuphatele kuami, u kamba diami dia muẋima.

¹⁴ Ki tua kexile tu di kunda maka mambote; tuendela kumoxi mu kuia ni mundu mʼonzo ia Nzambi.

¹⁵ Kalunga-ka-ngombe a ambate, a láuke ni muenhu uâ mu bombo diê, nda o mavu a a minhe mukulukusa; kuma muala usuéia mu bhata diâ, katé ni ku mixima iâ moxi.

¹⁶ O ki ngalʼemʼiki-phe, ngi dikola kua Nzambi; Jihova muene u ngi bhulula.

¹⁷ Ni ngoloxi, ni kimene, ni mediia, ngi di tenda kua muene, ngi kumba; o muene-phe u ngʼivua dízui diami.

¹⁸ U ngi kudila o muenhu uami ni kutululuka, ku mvunda ioso ia ngi kane; kuma o nguma jami a vulu muene, a ngʼendela ni ita.

¹⁹ Nzambi-phe u ngʼivua, hé u a katula o mahanha, muene ua xikama tunde okulu bhu kiandu kiê; (Selah.) akua-hi muene a kala kiki, ka xikina kudiela, ka moneka ngó uoma ua Nzambi?

²⁰ Muenhó ua zengela maku mê ku akuá a kexe-nê kiambote; o kikutu kia ukamba ua ki fukula.

²¹ Mu kanu diê mu nengana kiambote kala matheka, maji ku muẋima-phe kua mu kala mvunda; maka mê ma ẋanana kala maji, maji ua ku zuikila o dizu kala xibhata.

²² Se uevu kimbamba kia ku xina, iza na-kiu kua Jihova, muene u ku sokesa na-kiu; kuma muene kana kizuua ki ehela muthu uaiuka ku mu bhondeleka sé mbambe.

²³ Enhó-phe, Nzambi, a lundumune, a lauke mu bombo dia kalunga; ijibhanganga, akua makutu, ka kà zubhe dingi izuua iâ, né mu kaẋi ka kà bhiẋile-mu; eme bhabha-phe ngi dielela jinga ko kué.