Jisálamu 52 - O Mikanda Ikola

Kubelesa Mukua Phulu u Kala kisuéia

Ua Mesene Ngimba. Maxikile a Davidi, kieza Doueki mukua Edomo kua Saúlo, hé u mu ambela, uixi: Davidi ua bhiti ku bhata dia Abimeleke.

¹ Ua kakela-hi ni ufe anga uia ni ku di thatha, u dizonda dia kimi? Maji o kulenduka kua Nzambi ku kué, ku nangenena.

² Eie dimi dié di funha usuéia uoso, o kabódio kê mukuâ ni phoko ia bhutu mu kukuama.

³ Eie o phulu ia ku kala kota, o mbote ndenge; u beta kutanga makutu, ku xikina kuzuela kidi! (Selah.)

⁴ Maka a kudia akuenu ene a beta ku ku uabhela, eie u dimi dia kimi, di tanga mangonha!

⁵ Kiene kimoxi Nzambi-phe hinu u ku bula, kà ku tunga, kana! Hinu u ku tukula, u ku zangumuna mu balaka ié, u ku vuza muene ni lundanji bhoxi, phala ku xale dingi mbutu.

⁶ O athu aiuka a kà ki mona, hé a kà kala ni uoma; muenhó a kà mu olela, kuila:

⁷ Diene-ze o diiala dia ditunu Nzambiʼidi, mù kala kimbaka kiê; iu ua di fiiala o jimbongo jê kuvula, hé u di fikidila mu usuéia uê.

⁸ Eme bhabha-phe, ngi kula mukuâ ni muxi ua mudiva uauisu, ua buingita mʼonzo ia Nzambi; ngi dielela jinga mu kulenduka kua Nzambi, mu mivu ni mivu ki i moneka dizubhilu.

⁹ Izuua ioso ngi ku sakidila jinga eie, ngi dielela jinga mu dijina dié, kuma dijina didi diambote bhu pholo ia athuʼé angene.