Jisálamu 50 - O Mikanda Ikola

Nzambi Tua Fuama Tu Mu Bheza Mu Nzumbi ni Mu Kidi

Mukumbi ua Asafo.

¹ Kutende, Ngana Nzambi, Jihova, ua zuela; uexana ixi ioso, tunde ku tundila o dikumbi, katé ku dʼila.

² Kididi kia Ziione, ki ki moneka luiadi mu kuuabha, muene muala kutunda o kubenha kua Nzambi,

³ Nzambi ietu iú uiza, ka xikina kudixibha; ku pholo iê túbhia tuia ni kuaúla, mu jimbandu jê uenda ni kibhûngu kiavulu.

⁴ U handekela diulu ku thandu, ni ixi bhoxi, kuma ueza mu fundisa o mundu uê, uixi:

⁵ Bhongololenu athu ami ósole eze bhu kinama kiami, oso a te kikutu ni eme mu ku ngi satela.

⁶ Kiókole ku diulu o kutetuluka kuê; kuma Nzambi muène, muene u kala mufúndixi. (Selah.)

⁷ Ivenu, enu mu mundu uami, ngi zuele; u Izalaiele, ngi ku bhela umbangi: eme-muène ngi Nzambi, Nzambi ié ua ku vu.

⁸ Ki ngi ku bazela, kana, kuila ua fulu ku ngi satela; jisata jé ja kuoha izuua ioso nga ji mono.

⁹ Ki ngi ku tambula ngalote ié ia ngombe mu kibhanga, mba isutu ia hombo mu kilunga.

¹⁰ Mukonda jixitu joso mu itumba jami eme-muene, ni ibhaku ioso ku mukáu, né ikala jimidi.

¹¹ Jinjila joso ku milundu nga jʼijiia; kana kiama mu iangu ki ngi jimba, kuma o jinzungule joso ja iama mu mikáu, jami eme muene.

¹² Se nga kexile ni nzala, ki ngeje ku ku tangela-kiu; kuma ixi ioso iami eme, ni jimbongo jê.

¹³ Kifua ngi dia xitu ia jingombe, mba ngi nua manhinga ma jihombo?

¹⁴ Kota u satela Nzambi sata ia kusakidila; kumbidila kioso ki ua tange kubhana kua Suke-ku.

¹⁵ Nda u dikola ko kuami, mu kizuua ki kuiza o kutata; eme ngi ku kudila, eie anga u kala ni ku ngi ximana.

¹⁶ Maji oso-phe a bhukumuka, Nzambi u ambela, uixi: Eie ihi ki ku bhangesa kutanga o ijila iami? O kikutu kiami kia ku kalela-hi ngó mu kanu?

¹⁷ Eʼmuene kua xikina ku ku longa, maka mami ua ma takuila kuema dié.

¹⁸ Ki ua mono muii mu kunhana, u kuata-nê kisangela, o akua jiphanda ua di bundu-nâ kumoxi.

¹⁹ Dikanu dié dia sakalala ni kuzuela kiaiibha, dimi dié di funha makutu.

²⁰ U xikama mu kuâmba phange ié muene; monʼa mamʼenu u mu tatela ima ka i bhange.

²¹ Iene ima i ua bhange iii; mukonda-phe dia kudixibha kuami, ua ngi fika ngi mukuenu, nga soko ni ki ualʼeie; maji-eme-phe ngi ku bazela, o ikuma ié ngi i ta muene ku munôno ku mesu mé.

²² Kala kiki xinganekenu-kiu, enu kua Nzambi mua jimbi-ku; sumba ngi mi sanujuna kala hoje, u mi kudila ki mu mu mono.

²³ Uoso u ngi satela sata ia kusakidila, muene muthu ua ngi bhange ujitu; uoso ue u iukisa uendelu uê, muene ngi mu idikiza o ubhulukilu ua Nzambi.