Jisálamu 5 - O Mikanda Ikola

Musambu ua kimene ua muthu uaiuka u bhinga ku mu kudila

Ua Mesene Ngimba; ua kuxikila ku jimbèndu. Mukumbi ua Davidi.

¹ Bhana dítui ku maka mami, u Jihova; ividila kioso ki ngala ku di ngunguina.

² Ivua dízui diami dia kudikola, u sobha iami, u Nzambi iami; kuma ko kue eie kuene ku nga lungu ni kusamba.

³ Kukia ngó, eie u Jihova, u ivua o dízui diami; mu kimene munhá ngi bhana musambu uami kó kué, hé ngi kala mu ku ku xibhidila.

⁴ Kuma eie ku Nzambi ia kuila u xikina kuuabhela ituxi; mukua phulu-phe ka tena kukula musonhi ué.

⁵ Akua izala ka tena kuimana ku mesu mé; eie ua di zemba ni ene oso akalakala ituxi.

⁶ Athu oso a tanga makutu; Eie hinu ua-nda kua kà a jima o mbutu; muthu uoso uaiibha ni manhinga, mukua kunganala akuâ, Eie u Jihova, ua ku ibhila muene.

⁷ Maji eme-phe, mu kudielela o henda ié iavulu kinéne, ngala ni disesa dia kubokona monzo ié; ngi bhixila ni uoma mu ta pholo bhoxi bhu kanga dia Tembulu ié ikôla.

⁸ Ngendese, u Jihova, mu njila ja uiukilu ué, mukonda dia iá a ngi batamena; njila ié ki i kale ni jihonda bhu pholo iami.

⁹ Kuma enhó kuzuela kuâ ki kuala ni kukumbidila; miẋima iâ moxi ia di bhange kizakazaka kia usuéia; bhu dikelengu diâ, kina kia kalunga, sumbala a hanza ni dimi diâ.

¹⁰ A êlese ku mulonga, eie u Nzambi; nda a di bhale mu jipangu ja di longesa mudiâ; a kaiese, Ngana, mukonda dia kubhukumuka kuâ kuavulu; kuma eie muene, u Ngana, a ku kitukila.

¹¹ Maji oso-phe a lengela kokué, a tane-ku! A dikole ni ngalasa, kuma eie uene ku a bhângela; oso kiá a zola o dijina dié, a kolokote ku ku dielela.

¹² Kuma eie, Ngana, u mukua kubhanga mbote kua ió uoso uaiuka; jihenda jé, u Jihova, ji kala ngubu ia ku mu xitila.