Jisálamu 49 - O Mikanda Ikola

Muthu kingoho

Ua Mesene Ngimba. Mukumbi ua anʼa Kola.

¹ Ivenu maka iá, enu mu mundu uoso; bhanenu mátui, enu oso mua tungu mu ngongo.

² Ni enu mu akua lazu, ni enu mu jingana, ni jimonhi ni jingadiama, enu oso kumoxi.

³ Dikanu diami di zuela ni unjimu; o kubanza kuami, kua muẋima, ku kala kua uhete.

⁴ Ngʼividila kiambote ku tunda o kifika; o Sabhu iami ngenda ni ku i xikila ku mbànza.

⁵ Phalahi ngi kala ni uoma ua izuua iaiibha, kala kia ngi phopheka akua mangonha, a mu-ia ni ku ngi tela míkala?

⁶ Ió oso a dielela umonhi uâ, a di fiiala o kuvula jinbongo jâ.

⁷ A bhange ioso ia tena maji ki bhuala u tena kukula phangʼiê, mba ku mu bhakela kua Nzambi, ni kubhana kitadi.

⁸ Mukonda kukula, o muenhu ua muthu, kuate kiavulu, jimbongo né ji vula ki ji tena-bhu, kuma jene ji dianga kúbhua.

⁹ A ki lémbua muene, kuila muenhu uâ ki u bhu dingi, mba muthu mu kina kia kalunga u kamba kuia-mu.

¹⁰ Kikale ene oso muene mu aia; ni njimu i fuê; ni kiôua ni bulutu ene oso kiómuene, o jimbongo jâ a ji xila akuá.

¹¹ Moxi dia muẋima uâ-phe, a fika kuma o jinzo jâ ki ji budika dingi, o jixi jâ a ji luka o majina mâ-ene.

¹² Maji o muthu ku kijingo-phe, kene mu nganga; ua soko ni ibhaku i bhanga ngó tuizuua.

¹³ Kikexilu kiâ kienhiki kia uoua uoso; a a kaiela mu manhanu-phe a a ximana, exi a dimuka. (Selah.)

¹⁴ O mu ku a funda, a di kaiejela kala jimbudi jiia mu kibhanga; kalunga-ka-ngombe u a kombola mu bombo diê; kukia ngó mu kimene, kijingo kiâ kia bhitila kia ku athu aiuka; o mukutu ua uabhele iú sekumukina mu mbila, mukonda ki ua mono dingi kididi kia kukala.

¹⁵ Nzambi-phe u ngi tambula o muenhu uami kua kalunga-ka-ngombe, hé u ngi bhongolola kua muene kuoso kuala. (Selah.)

¹⁶ Ku kale ni uoma, muthu se ua di bhange kilamba, mba dibhata diê diʼla kala dia tambula unéne.

¹⁷ Kuma hinu kiʼàfua, ka kʼàmbata kima; o unéne uê ka kà tena ku ila na-u bhuamoxi.

¹⁸ Suke kia kexe ku muenhu ua di fika kulúnga; kuma athu a ku ximana ki u di dikila kiambote;

¹⁹ Hinu-phe u kaiela ku aia o malembʼê; ku muanha kuazele, keza-ku dingi.

²⁰ Muthu ku kijîngo kene kunanga; ua soko ni ibhaku i bhanga ngó tuizuua.