Jisálamu 48 - O Mikanda Ikola

Ziione Mbanza Ia Jihova Ia Jituka

Muimbu. Mukumbi ua anʼa Kola.

¹ Jihova munéne, muene ngó ua O tokala ku mu ximana jinga kiavulu, mu mbanza ia Nzambi ietu, ku mulundu uê uangene.

² O mulundu ua Ziione, kididi kia uabha, bhua di leka kiambote, ngalasa ia ixi ioso! o mulundu ua kexila ku maẋokololo ku mutundila-kumbi, mbanza iangene ia Sobha ia dikota.

³ Nzambi a mu ijiia mu jipalaxu jê, kuma ditala dia kulengela, nguma ki i tena-bhu.

⁴ Mbata, talesa-ze, sai jisobha ja di kasele, a di ta muene ku mikalatata, anga a vubuka ni ita.

⁵ Maji edi ngó a mona Ziione, a diuana! A teketa, muene, anga ata lusolo mu kumuangana!

⁶ Mueza kimbulambula, ni misusu kala ia muhatu ua mu vuala.

⁷ Eie, hinu ua kà bula o jinaviiu ja Talxixi, u ji muanga ni kitembu kié kiasuína kia mubhetukila-kumbi.

⁸ Kala kioso ki tua kʼivua jinga, lelu kiene muene ki tua ki mono, mu mbanza ia Jihova dia ifuẋi, mu mbanza ia Nzambi ietu; kuma kia tungu Nzambi, ka tena ku ki bula. (Selah.)

⁹ Tua xinganeka o jihenda jé, eie u Nzambi, mu Tembulu ié mu tuaii.

¹⁰ Kala kia fumana o dijina dié, Ngana Nzambi, kiene ue kiende o diximanu dié, katé ku maẋokololo a jixi; o lukuaku lué lua kúdia, luezala kubatula kua kidi.

¹¹ Kuma mulundu ua Ziione, a tane-ku! o jisanzala ja Juda, ji sanguluke! mukonda dia mabatuilu mé.

¹² Tundenu mu kanga, mu kondoloke Ziione; alulenu muene o tuthôndo tuê.

¹³ Talenu kiambote o kipena kia lumbu luê, tongininenu muene o jipalaxu jê; phala mu ki te ku dilunda, muiji ua kèza-ku nʼa kʼivue.

¹⁴ Mukonda o Nzambi i kala kiki, muene Nzambi ietu tu xalela-nê katé ku hádia; muene u kala kilolo kietu kia ku tu endesa katé bhu ufilu.