Jisálamu 46 - O Mikanda Ikola

Nzambi Disuamu, Kimbaka kietu

Ua Mesene Ngimba. Mukumbi ua anʼa Kola. Muimbu iú mbimbi iê ia Ana Ilumba.

¹ Nzambi dilengelu dietu, nguzu ietu, kota dia dikuatekesu dia zukama mu jiphaxi.

² Kienhiki, ki tu kala ni uoma, né-mbe oxi izamba, mba milundu iê i suetuka katé mu kaẋi ka musanza ua kalunga.

³ Né-mbe o menha mê ma fuluka, anga ma numina, mba milundu i tunguta ni kusuína kuê. (Selah.)

⁴ Sai-ku ngiji o milombo iê i tekela o mbanza ia Nzambi; kididi kiangene kia mabhata ma Sukè-ku.

⁵ Nzambi iú bhobho, muene uala muʼaxaxe kê, kididi kiê ka tena ku ki sendumuna; Nzambi u di meneka mu ku a kudila.

⁶ Matumbu edile ni ene bulukutu, o ilômbo ioso ia salumukine; maji muene uedi ngó u zuela, ixi ioso ia botomoka!

⁷ Jihova dia ifuẋi tuala-nê kumoxi; o Nzambi ia Jakobo kimbaka kietu. (Selah.)

⁸ Zenu, mu di uane o ikalakalu ia Jihova! Mu tale o isunji ia bhange muene mu ngongo!

⁹ Ita ua i suikika katé ku maẋokolo aʼxi; uta ua mufula ua u bukula, dionga ua di batula mu kaẋi; o makalu a ita ua oha mu túbhia.

¹⁰ Mu batama, phala mu kʼijiie kuma eme ngi Nzambi; eme-muène ngi jînga muʼaxaxi ka matumbu; eme-muène ngi zangalala ue mu ngongo ioso.

¹¹ Jihova dia ifuẋi tuala-nê kumoxi; o Nzambi ia Jakobo kimbaka kietu. (Selah.)