Jisálamu 45 - O Mikanda Ikola

Muimbu Ua Ubhànga

Ua Mesene Ngimba; mbimbi ia Itulu Mukumbi ua anʼa Kola. Maxikile Muimbu ua Jihenda.

¹ Muẋima ua ngi fulujuka ni maka mambote; ngi ta mukumbi uami ua kutanga maka a tokala ni sobha; dimi diami mukuâ ni pena iakuata hete ia kusoneka.

² Eie kuuabha kué kuengi, kua anʼa mala mu ngongo ndenge; eie o kusangumuka kua ku tunga kiá ku mizumbu; Nzambi kiene kia ku tunguila ni dibesá di nangenena.

³ Dizonda dia kimi! maneka o xibhata ié bhu ditabela, u zuate o fuma ié ni unénene ua ungana ué.

⁴ Mondala, uende ni kijingo kié; iene ioso u soke na-iu mu kubhângela o kidi, ni kukuatekesa athu edi ni kulúnga ni kubelesela; lukuaku lué lua dilu lu ku longe kubhanga ima ia undanda.

⁵ Misongo ié i uasa, iatu muene o jisungu, ia kuata mu mixima ia jinguma ja muenexi; ifuẋi ia dibhale, eie hé u bhita ni ku a diota.

⁶ Kiandu kié, Nzambi iami, ki xalela sè thembu, katé ku hádia ni hádia; mbasá ia utuminu ué, ia kukumbidila kuoso.

⁷ Eie u inda ioso i iukila mu kidi, o kudiodia milonga ku xikina; o Nzambi, Nzambi ié, kiene kia ku undila ni maji; maji a kusanguluka, phala u tunde akuenu ene oso.

⁸ Izuatu ié ioso i nuha mila, ni aloué, ni kaxiia; o mu palaxu ia mazu a nzamba, muene mua mu ku xikila o jimbànza ja ku ku sanguluisa mu fesa.

⁹ Ilumba i ku kauidila, anʼa jisobha; o bhu mbandu ié ia dilu, bhene bhua ku imanena o díbhanga, na mvale, ua kembe ni ulu ua iuka kinéne ua Ofidi.

¹⁰ Tala kunu, monʼa kilumba, ivua-ze ngi ku fuetele, bhana mátui nda u xinganeke; jimba-ku kiá lelu ku jindandu jé, ku bhata dia tatʼenu ku te-ku dingi muẋima.

¹¹ Muenexi ua ku solela o kuuabha kué kuavulu kinéne; di tambulule-nê, kuma muene muadi ué.

¹² Kilumba, mukua Tilo, u mu mone kia-nda kuiza ku ku bhakuila maujitu; o jimonhi ja makota ku mundu, ji ku dionda ku a suua.

¹³ Díbhanga, monʼa sobha, mu ku mu bhenga u benha; jithanga jê ja jinjikita, jʼòtunge ni ulu.

¹⁴ Ibhôbho i mu bheka kua muenexi ni izuatu ia makembu; ilumba ni akuâ, o makamba mê, ejila-nê kumoxi.

¹⁵ U a mona iá bokona mu phalaxu ia muenexi, ene oso ni kuimba ni kusanguluka.

¹⁶ Ua kexile ngó ni jitata, o kiki u kala ue ni ana, u a bhana kijingo kia kukala jingana mʼoxi ioso.

¹⁷ Ngi bhangesa kuila, o dijina dié, di fumana ku miji ioso; mundu a kala jinga mu ku ku ximana ku mivu ni sé dizubhilu.