Jisálamu 44 - O Mikanda Ikola

Mundu Ua Tate a Samba Kua Ngana

Ua Mesene Ngimba. Mukumbi ua anʼa Kola. Maxikile.

¹ Etu tua kʼivila jinga mu mátui metu, Ngana Nzambi, jitata jetu ja kexe ku tu tangela o malunda, kioso eie ki ua kalakala jinga mu izuua ia ene, mu izuua ia xahulu.

² Kioso o lukuaku lué ki lua kaia o matumbu, a kambe kuijiia Nzambi, anga u a phapha ene bhu kididi kiâ; ni kioso akuaʼxi ki ua a takula, hé a muangana; o ene-phe, a kuata, a zande.

³ Kuma ixi ka i tambula ni xibhata iâ ene, lukuaku luâ ene ki luene kua a bhana o uzonda; maji o lukuaku lué, ni nguzu ié, ni kubenha kua pholo ié, mukonda eie ua a kala ni kiadi.

⁴ Eie u Nzambi, eie-muène u Sobha iami; kuma eie ua bhana o uzonda kua Jakobo.

⁵ Mu nguzu ié tu lundumuna oso a tu zembe; mu dijina dié tu a titidila muene bhoxi oso a tu balukila.

⁶ Uta uami ua mufula ki uene u ngi dielela, o xibhata iami ki iene i ngi bhana o muenhu.

⁷ Maji ua tu bhana o muenhu, eie ua kaia o jinguma jetu; eie ua kuatesa jisonhi kua oso a tu zembe.

⁸ Thâthe ietu, Nzambi, muene tu mu tumbula kumbi dioso dia kambàmba; tu bhana jiphembèle mu dijina dié eie, izuua ioso sé dizubhilu. (Selah.)

⁹ Maji o kiki-phe eie ua tu ehelela, tua jîngunuka; ilombo ietu kuala ku i bheka dingi mu kuia ku ita.

¹⁰ Ua-lu tu bhesa lusolo, bhu pholo ia jinguma jetu; ió a tu zembe, ene a mu tu bhûnda, a tu bomona muene, o jimbote jetu joso a tu bu-ju.

¹¹ Eie ua tu bhakula, etu tua di bhange tu jimbudi jâ ja kúdia; ua tu muanga-muangena mu jixi ja akua matumbu kejiia Nzambi.

¹² Mundu ué, Ngana, ua a sumbisa mu kingoho, eie-muène kua nganhala-ku kima mu ku a ta uenji.

¹³ Tua bongo malebhu ku akua madiembu u tua zukama na-u; tua di bhange tu jisemenhi, tu ioua ia iá a tungu mu jimbandu jetu.

¹⁴ Tua fumana mukua ni Sabhu ku akua jixi ja matumbu; athu amukuá kia tu mona a kubuakesa ku mítue.

¹⁵ Izuua ioso usébhue uami ua ngi naminina, jisonhi ja ngi vungu katé mu inama.

¹⁶ Mukonda dia dízui dia ió u ta o jisèka, ni kunonga; mukonda dia nguma, ni mukua kutatela o phonzo.

¹⁷ Sumbala ima iene ioso iii ia tu iza, etu-phe ki tu ku xibhaka, mba tu ku jimba; o kikutu kié, ki tu ki kuata ni makutu.

¹⁸ Muẋima uetu ki ua vutuka ku dima, o makànda metu ue ki ma tundu mu njila ié.

¹⁹ Kia bhiti kiebhi, ki ua tu tolojola kiki? Tua batukila bhu kididi kiala kubuzila o jimbulu, ua tu vungu kitombe kia kalunga.

²⁰ Se etu tuedile o dijina dia Nzambi ietu tu di jimba, se tua bhele o makuʼetu kua Nzambi iengi.

²¹ Manhi o Nzambi u kamba ku ki ijiia, Se muene muène uejiia o ikutu ioso ia muẋima ua muthu?

²² Xi, kuma o ki tualʼiki-phe, a tu jibha-jibha izuua ioso, mukonda dié eie; a tu kita mukua ni jimbudi jiia bhu dijibhilu.

²³ Phaphumuka-ze, Ngana! Phala-hi, uila kala uaii ku kilu? Balumuka! Kuile kala ua tu zembelà-ku!

²⁴ Phala-hi pholo ié u i sueka, ki tu ku mono dingi, anga o usébhue uetu ni ubhika uetu hé u ku jimba?

²⁵ Kuma o muẋima uetu ua toloka katé mu fufuta bhoxi; o mukutu uetu ua fufujuka muene mu mavu.

²⁶ Balumuka, uize mu ku tu bhângela, u tu kudile, mukonda dia jihenda jé.