Jisálamu 42 - O Mikanda Ikola

DIVULU II ( Jisálamu 42—72 ) Muenhu Ua Muthu Uinda Nzambi

Ua Mesene Ngimba. Maxikile ma anʼa Kola.

¹ Mukuâ ni mbâmbi i haha, mukonda honga ia menhʼa hungulule, ia mu kala dikanga, kiene ue o muẋima uami uala mu haha, mu kuinda eie, u Nzambi!

² Muenhu uami ua ngʼizala ni dinhota dia Nzambi, o Nzambi ia muenhu; kizuua kiahi ki nga kà bhixila, hé ngi di bhakula bhu pholo ia Nzambi?

³ Muanha ni usuku, kúdia kuami masoxi; mbe iá ala ku ngi ta môndo izuua ioso, exi: Nzambi ié ua ku kala kuebhi?

⁴ Kienhiki ngʼila ki xinganeka, muẋima moxi ua ngi botomoka; kioso ki nga kexe mu kuila kumoxi ni kifuxi, nga mu ia ni akuetu mʼonzo ia Nzambi, ni dízui dia ngalasa ni kuximana, tua vulu tuala mu bhanga fesa!

⁵ O kiki, ua bhuidila-hi muẋima uami? Ua Zôndela-hi moxi diami? Dielela kua Nzambi, hinu ngi mu ximana dingi, hinu ngi bhanduluka dingi mu kumona o pholo iê.

⁶ Eie, Nzambi iami, tata! muẋima moxi ua ngi bhuila! kʼiene ki ngala ku ku banzela ku makanga, ku thála ia Njolodá, mu mbetekete ia mulundu ua Helemone, mu kutunda bhu kalundu ka Mizale.

⁷ Honga i dʼitaiela ni honga ia mukuá, mukonda dia kinuminu kia mabhubha mé, eie Ngana; o mafuta mé moso ni mabhuku mé, ma ngi bhiti muene ku thandu.

⁸ Suke kiene, maji Jihova-phe kà kamba kutuma o kulenduka kuê mu muanha; o mu usuku ngi kala jinga ni muimbu uê, u kala musambu ua kubheza Nzambi ia muenhu uami.

⁹ Nga kʼàmbela Nzambi, ngixi: Eie u ditadi diami dia kipena, ua ngi jimbila-hi? Phala-hi ngiia ni kudila ni mukondo mukonda dia ubhika uala ku ngi bhikisa na-u o nguma?

¹⁰ Môndo uala ku ngi ta o jinguma jami ua di bhange mukua ni xibhata ia mu ngi toma mu ifuba; kioso ki ala ku ngʼila izuua ioso, exi: Nzambi ié ua ku kala kuebhi?

¹¹ Eie, ua bhuidila-hi muẋima uami? ua zôndela-hi moxi diami? dielela kua Nzambi; kuma hinu ngi mu ximana dingi! Mukonda, muene o kusangumuka kua pholo iami, muene Nzambi iami.