Jisálamu 41 - O Mikanda Ikola

Ua Mesene Ngimba. Mukumbi ua Davidi

¹ U zediua o muthu ió uoso u xinganeka ngadiama; kuma mu kizuua kia dilamba, Jihova u mu kudila ue bhuoso bhua tatela.

² Jihova u mu kondeka, u mu bhana muenhu; u mu bhana o kukala ni dibesá mu ngongo; ka ẋikina ku mu bhakula mu vondadi ia jinguma jê.

³ Jihova u mu bhana nguzu bhoxi dia kukata; anga u mu balumuna-bhu, na disanze dingi.

⁴ Eme ngedi, ngixi: Eie u Jihova ngi kuatele henda; ngi sake o muenhu uami kuma nga te ituxi ko kué.

⁵ Jinguma ja kuata ku ngi longolola, exi: Ka fuila-hi kiá, dijina diê ni di bhué-ku?

⁶ Né bhu kala muthu uiza ku ngi kunda, u tanga ngó makutu, maji o muẋima uê ua bhongolola usuéia; o ki aia ku kanga u enda ni jimbuémbue.

⁷ Ene oso a ngi zembe, ala mu fueta mudiâ, a kuata ku ngi fika ima iaiibha.

⁸ Exi: Uhaxi ua kufua kiá ua mu kuatʼó; o bhoxi bhua zekʼobho, ka balumuka-bhu dingi!

⁹ Katé ni kuphatele kuami, kamba dia muẋima, ió muene nga mu dielela jinga kiavulu, mukua kudia ku meza mami, ua ngi te ue o musónde ua ku ngi bhana kibhalu.

¹⁰ Maji eie-phe, u Jihova, ngi kuatele henda; ngi balumune-bhu, phala ngʼa bhane o futu ioso ia a tokala.

¹¹ Bhene bhu ngi kʼijidila kuila eie ua ngi kala ni ngalasa, se ngi mona kuma o nguma iami ka ngi lende.

¹² Eme-phe bhabha, ua ngi bhana o kulaia, mukonda ua ngi mono o kulúnga kuami, eie ua ngi bhana o kuimana bhu pholo ié, katé ku hádia ni hádia.

¹³ A tane-ku! Jihova, Nzambi ia Izalaiele, tunde dia tunde, katé dià kalelà-ku! Amén, ni Amén!