Jisálamu 40 - O Mikanda Ikola

Kusamba Phala Kubhinga Kubhuluka

Ua Mesene Ngimba. Mukumbi ua Davidi.

¹ Jihova nga mu kinga ni kienhenge; muene ua ngi bhetamena, ua ngʼivu o kudikola kuami.

² Ua ngi zaula ue mu dikungu dia kubhondalala, ua ngi tombola mu diloua diòmbama; ua ngi tula inama bhu ditadi, phala makànda mami ma diate kiá bhua kolo.

³ Ua ngi te muimbu uobhe mu kanu diami, ua ngi bhana mukumbi ua kuximana Nzambi ietu; phala athu avulu a ki mone, a kale ni uoma, nʼa kale jinge mu dielela kua Jihova.

⁴ U lúnga o muthu ió u dielela kua Jihova, u fula kukaiela akua izala, ka di te ni iá a dianguka ni makutu.

⁵ Jihova, Nzambi iami, madiuanu mé mavulu mʼu ua kalakala, ni mabanzelu mé ma ku tu banza etu; kana-ku dingi muthu tu ku fika-nê; mabanzelu mé se tuambe ku a tanga ni ku a tumbula mu dimoxi-dimoxi, ki bhuala muthu u tena ku a kuata konda.

⁶ Kusata mienhu, ni kubhakula idima, eie ki kuene kua ku uabhela, kana; maji, bhenhobho ua ngi xitununa o mátui; sata ia kuoha, ni ia kuluulula, ki iene i ua ngi bhingi.

⁷ Ngʼetaia-phe, ngixi: Eme-ami-ú; kala kia ngi soneka mu ndunda ia divulu;

⁸ Nga sanguluka mu kubhanga ki ua mesena eie u Nzambi iami; xi, mbata, o ngonge ié ia ngi kala moxi dia muẋima.

⁹ Nga bhana jingolokela ja mabatuilu mé ma kuiuka bhu kionge kia mundu uavulu; ki nga xikina kudixibha, ni kujika dikanu diami, eie-muène, Ngana, u Jihova, ua kʼijiia.

¹⁰ Mbote ié, ki nga i sueka ngó mu muẋima uami, lémbua! o henda ié ni kidi kiê ki nga i dingi, kana, kuila o mundu ua kionge kiadikota a kamba ku i ijiia.

¹¹ Eie ue, u Jihova, ku fule ku ngi ta muẋima ni jihenda jé; o kiadi kié ki ngi kale ku mbandu joso, ni kidi kié.

¹² Kuma mavuua ma vudila-ku ma ngi phopheka; o ikuma iami ia ngi kaie, ia ngi kuata, katé ki ngi tena ngó kubhetuluka. O ikuma iami kota mu kuvula, jindemba mu mútue uami ndenge. Kia bhekesa muẋima uami kuia ku kiambu.

¹³ Ki ku uabhele, u Jihova, o ku ngi kudila; endelà-ku, Ngana, mu ku ngi kuatekesa.

¹⁴ Enhó a kakuke, a diuane, sonhi ja a kuate muene, oso a bhindamena ku ngi seia o muenhu uami ni ku ngi jibha; a bhese lusolo Ngana, a kuatese jisonhi, oso a-lu sota ku ngi bhanga phulu.

¹⁵ A sekalese, mu kaxtiku ka kubhuma kuâ, enhó oso a kuata o ku ngi uaua!

¹⁶ Oso-phe ala ku ku kana eie a sanguluke, a kale jinge mu kutanena momué; oso a zola o kubhuluka ku tunda ko kué, a kale mu kuila jinga: Jihova ukôla.

¹⁷ Eme-phe, bhu ngalʼabha, ngi ngadiama, nga tâte; maji o Ngana-phe ua ngi bhake muẋima ni ku ngi sasa; eie ngó u mukuatekexi uami, u mubhuludi uami; kana kukokoloka Nzambi iami, tata, endelà-ku Ngana!