Jisálamu 4 - O Mikanda Ikola

Kudielela Nzambi

Ua Mesene Ngimba; ua Kuxikila ku jimbanza ja jingoji. Mukumbi ua Davidi.

¹ Ngʼivue kioso ki ngi dikola, u Nzambi iami kuma eie u ngi bhana o kulúnga; Eie ua tena ku ngi bheka bhua disanze, kioso ki nga kexile bhu kíbhidi; ngi lendukile dingi, u ngʼivue o kusamba.

² Enu malʼenu, mu ki jijidila-hi anʼathu, tata, o ku ngi jingununa ni ku ngi sebulula? Mu suka katé bhebhi ni kuzola malebhu, ni kubhindamena makutu? (Selah.)

³ Ijiienu-kiu kuma Jihova, mukua uoma uê u mu tungula, hé u mu tambula konda; Jihova u ngʼivua, kioso ki ngi dikola kua muene.

⁴ Kalenu ni uoma, ki mu te dingi ituxi; bhu hama bhu mua zeka, xinganekenu moxi dia miẋima ienu phala mu di xibhe. (Selah.)

⁵ Nzambi mu mu satela ni kidi, phala Jihova mu mu dielele kiambote.

⁶ Sai athu avulu ala kuila: Tu sanga kuebhi o kibhuku? Jihova phe tu bhetukile ngó o pholo ié, kubenha kué ku tu tule.

⁷ Ngalasa i ua ngi te ku muẋima uami kota, ia athu ndenge mu thembu ia kuvula o masa ni vinhu.

⁸ Kala kiki, ngi zeka ni kutululuka, ngiia muene ku kilu; mukonda eie u Jihova uala ku ngʼinga; né ku ubheka uami ngala bhua kondama.