Jisálamu 39 - O Mikanda Ikola

O Muenhu Iú ki Uene kunanga

Ua Mesene Ngimba, Jedutunu. Mukumbi ua Davidi.

¹ Ngedile ngixi: Ngi di langa o kuzuela, phala ki ngi te kituxi ni dimi diami; dikanu diami ngi di kuta jingoji, kioso ki ngʼimana kumoxi ni muthu uabhukumuka.

² Nga dixibhʼami muene, ngi kala dibubu, ngedi muene hudí, sumbala nga dimbuluka moxi, o malamba a ngi kuata, anga aia dingi ni kuvula.

³ Kathangana muẋima ki ua xikina dingi, mu kubanza ni kubanza, túbhia tua uama; anga ngi zuela kiua ni dimi, ngixi:

⁴ Ngi londekeze, Ngana, bhu mbámbe bhu nga kà suka; ni konda ia izuua iami se ikala ikuẋi? Mbé ngʼijiie kithangana kioso ki ua ngi bhana, kuma ki ngi kima!

⁵ Talesa izuua iami mu ku i zonga, kala ki ua i xindi eie, kànda dia lukuaku diia-bhu ngó luofele; o kithangana kia muenhu uami, ku mesu mé ki kima, kuma ni kidi muene, muthu kingoho né uadisanze, kene kunanga. (Selah.)

⁶ Kidi muene, muthu kinzúnzumbia mu kunhunga kuê; u talê ngó hadi ni kututumba; u lunda nzungule ia jimbongo, maji kʼejiia uoso hinu u ji dia.

⁷ Ki ngalʼiki-phe, Ngana, tata, nga kinga-hi dingi? Nga dielela ngó ko kué.

⁸ Ngi bhulule ku ituxi iami ioso; kana ku ngʼehelela, ioua ni i ngi mone kusekala.

⁹ Ngedi nʼemuene húdi, ki ngi zuela kima; kanu diami nga di jika mukonda eie ua ki bhange.

¹⁰ Ngi katule-diu, Ngana, o dibhebhu di ua ngi tula; nga toloka ni jihuxi ja ngi bhana o lukuaku lué.

¹¹ Kuma eie ki u bazela muthu, mukonda dia kutondala kuê, o kuuabha kuê ku mu bhua, u kala kala kizuatu, a ki kesa kuala kabamba. Ni kidi kiene, muthu bá kingoho! Kikexilu kiê kifua mukua ni mbundu iiza-ku, kindala iaiê. (Selah.)

¹² Ngʼivue Jihova, o musambu uami; bhana mátui uivue, Ngana, o kudikola kuami; ku kambe ku ngi suua o kisoxi kiami; kuma ngi musonhi ué, ngedi kala ngi nzuángiza, ngi ngenji ngó, kala kia kexile o jitata jetu enhoso.

¹³ Ngi sosoluele hanji, ngi tambule kilunji; ngi dividile kithangana kioso kia ngi xala-ku hanji, mu kutunda kulu dia mundu.