Jisálamu 38 - O Mikanda Ikola

Mukua Ituxi U Diela Hé U bhinga Muloloko

Mukumbi ua Davidi, ua kulembalesa.

¹ Jihova, tata, kana ku ngi bazela ni kutema; kana ku ngi beta ni kuthathamana.

² Kuma o misongo i ua ngʼase, ia ngi kuata muene; o lukuaku lué lua ngi tula ni kunema.

³ Mu jixitu jami ki mua ngi kala dingi kima kia disanze, mukonda dia kuluuala kué ku ua ngi luualela; mu ifuba iami ki muala dingi kutululuka, mukonda dia ituxi iami i nga te.

⁴ Mukonda ikuma iami ia ngi bhiti ku thandu, nga jikinina muene; ia ngi xina ni iene kala kimbamba kia dikota.

⁵ Jifidila jami ja nuha, ja bolo muene, mukonda dia uoua u nga bhange.

⁶ Nga kotama, nguzu ja ngi bhu; kumbi dioso ngala kuenda ni dilamba kala ngi sébhue.

⁷ Kuma mu mbunda mua ngʼizala ni misusu ia kutemanana; o mu jixitu jami ki muala ngó kima kia disanze.

⁸ Nga iokojoka, ngabhu-bhu muene kiavulu; ngi kuata ngó kukumba mukonda o muẋima mʼoxi ki ua ngi tula kididi!

⁹ Ngana, ima ioso i ngandala eie ua ijiia; o kudikola kuami kua kambe ku ku ívua.

¹⁰ Miẋima iami iala ku ngi titila, o mu mukutu nguzu nga i lémbua; o mesu a ngi kala ni kavunda, ki ngala kumona dingi.

¹¹ O makamba mami ni jinzukame jami, a ngi sondoloka mukonda dia uhaxi u ngala na-u; o jindandu jami jemanena kiá mu kanga.

¹² Enhó ue ala ku ngi seia o muenhu uami, a mu ngi tela míkala; athu ió a mesena ku ngi kuama, a tanga ima ia phulu ioso; a nanga kumbi dioso dia kambàmba ni ku ngi kanena.

¹³ Eme-phe, kifua nga di bhange ngi muxilu, ki ngʼivu kima; mukuâ ni dibhubu, ki ngi jikula dikanu.

¹⁴ Nga di bhange kala muthu kevu kia mu ambe, o mu kanu diê ki muala dingi kia kuvutula.

¹⁵ Kuma nga dielela ko kué, u Jihova; eie u ngʼivua, Ngana, u Nzambi iami.

¹⁶ Nga ku ambela, Ngana, ngixi: Ngʼivue, phala enhó ka kale mu ku ngi uaua. Anga a beta dingi kuzangalala, kia ngi mona nga xangumuka.

¹⁷ Kuma ki ngalʼiki, nga-lu sota kudibhala; o kukata ki kua ngʼeha dingi.

¹⁸ Nga di ẋikina-phe o kuêla kuami; kituxi kiami ngi ki diéla, né ngi ki talela hadi.

¹⁹ Jinguma jami, a ngi kitukila, a suína; ió a ngi zembe, sé kikuma, avulu.

²⁰ Ni ió akua kubhanga phulu kua mukuâ ua a bhange mbote, a ngi zembe uâ, mukonda eme nga solo kubhanga o mbote.

²¹ Eie, Ngana, kana ku ngʼambudisa u Jihova; Nzambi iami, tata, kana ku ngi kala dikanga.

²² Endela-ku mu ku ngi kuatekesa, eie Ngana, u kibhamuenhu kiami!