Jisálamu 34 - O Mikanda Ikola

Lolenu Mu Mone kuma Jihova Uene Ni Mbote

Mukumbi ua Davidi, kia fikixile ulaji bhu pholo ia Abimeleke, muene anga u mu kaia, hé u muangana.

¹ Ngi benzela Jihova mu thembu joso; diximanu diê di kala jinga mu kanu diami.

² Muẋima uami u ta thâthe iê mu dielela ki bhanga Jihova; oso abelesela kia kʼivua, a kala ni ngalasa.

³ Ngi bandienu, akuetu, mu jîngisa Jihova; tu kuatele kumoxi mu tumbula dijina diê.

⁴ Nga soto Jihova, iú uetaia; ua ngi kudila ku ima ioso i ngi kuatesa uoma.

⁵ Oso a tala kua muene, a benha; jipholo jâ ki ji kala dingi ni jisonhi.

⁶ Ngadiamʼiii ia dikola, Jihova ua mu ivu, ua mu kudila mu jiphaxi jê joso.

⁷ Anjo ia Jihova i kala jinga ku kilangidilu kia iá a mu kuatela uôma, hé u a kudila.

⁸ Lolenu, mu mone kuma Jihova uene ni mbote; muthu ió u lunga uoso ua mu dielela muene.

⁹ Jihova mu kuatedienu uoma, enu mu athuʼê ósole; ki kuene kubhindama kua iá a kala ni uoma uê.

¹⁰ Inda o minzangala ia jihoje, i bhindama, i tata ni nzala; iá-phe a sota Jihova, kana kima kiambote kia a kamba.

¹¹ Zenu anandenge, mu ngʼivue; eme ngi mi longe o uoma ua Jihova.

¹² Muthu uebhi ua mesena o muenhu, u inda izuua iê i vula nʼa mone mbote?

¹³ Aiuka! dimi dié ki di kale ni phulu, o mizumbu ié ki i tange makutu.

¹⁴ Ku phulu, tunde-ku, u bhange o mbote; sota o paze, ni ku i jijila.

¹⁵ Mesu ma Jihova ma lûngu kua iá aiuka, o mátui mê mala kuividila kioso kia di kola.

¹⁶ Pholo ia Jihova i luualela oso a bhanga phulu, phala ku a vuza mu ngongo, ka xale kijimbuete.

¹⁷ Aiuka-phe a dikola, Jihova u a evua, u a kudila mu jiphaxi jâ joso.

¹⁸ Jihova ua zukama kua iá a toloka miẋima, u bhulula oso a talamana mu nzumbi.

¹⁹ Uaiuka u mona jiphaxi javulu; maji o Jihova-phe u mu kudila mu jiphaxi jê jene joso.

²⁰ U langa ifuba iê ioso; ni kimoxi ngó ki ki bukuka.

²¹ O mukua phulu, phulu iê iene hádia i mu jibha; oso a zemba akuâ a iuka, hinu a kà sekala.

²² Jihova-phe u tambula konda ia muenhu ua jiselevende jê; kana muthu u sekala ua mu dielela muene.