Jisálamu 33 - O Mikanda Ikola

Kuximana Nzambi Ua Bhanga o Diulu ni Ixi

¹ Sangulukenu kua Jihova, enu athu aiuka; kuma kuximana kua fuama oso emana mixima nzanza.

² Sakidilenu Jihova ni kuxika mbànza; mu imbidienu ni kakoxi ka kuinhi dia ngoji.

³ Mu tedienu mukumbi uê ua ubhe; xikenu uhete, mu tambuijile kiambote.

⁴ Kuma kizuelu kia Jihova kia kufidila; kukalakala kuê kuoso kua ufiiele.

⁵ Muene u inda o kufúndisa kua kidi ni kutetuluka; ixi iezala ni jimbote ja tundu kua Jihova.

⁶ Kizuelu kia Jihova kiene kia bhanga o diulu; kifuẋi kioso kiala-ku kiejila ku muha ua dikanu diê.

⁷ U kuata menha a kalunga kala ua a bhake mu mbinda; o musanza uazongo u u lunda mu mabhakelu mê.

⁸ Ixi ioso i kuate uoma ua Jihova; oso a tungu mu ngongo a mu ijiie kuma ukôla!

⁹ Kuma muene uazuela ngó, ioso ia di bhange; Kia tumina dingi, ima ioso ia tukuluka.

¹⁰ Jihova u fudisa o phangu ia akua jixi; kikutu kia athu mu ngongo u ki sukika.

¹¹ Phangu ia Jihova kene ku i lungulula, kuma ia kalé; kikutu kia ta muene, ki xalela ku miji ni miji.

¹² Ixi ioio i zediua, avu Jihova kuma Nzambi iâ; ni mundu uoso ua solo muene, kuma undundu uê.

¹³ Jihova ku diulu u zongola bhoxi; ana athu ene oso ki bhuala ua mu jimbi.

¹⁴ Bhu kididi kiê bhua tungu, u tala mu kanga, akua bhata oso mu ngongo a mu kala ku mesu.

¹⁵ Ene oso muene ua a bhanga o mixima iâ moxi, u tongolola o imbamba iâ ioso ia bhanga.

¹⁶ Sobha ka fike kuila kilômbo kia dikota ki mu bhana kulenda; dizonda ue ka di fiiale o nguzu iê iavulu.

¹⁷ Kabalu makutu, ku mu dielela ku ita; o nguzu iê ni kulenga kuê, ki ku bhana muthu muenhu.

¹⁸ Diesu dia Jihova-phe di kala kua iá a mu kala ni uoma uê; ni kua iá a dielela o henda iê.

¹⁹ Ku a langa o muenhu uâ mu kaẋi ka iluezu ia kúfua; ni ku a bhana o kulaia mu thembu ia nzala.

²⁰ Etu, ki tualʼiki, tu kinga kua Jihova; muene dikuatekesu dietu, muene dixitilu dietu.

²¹ Muẋima uetu u sangulukila mua muene; mukonda tua dielela o dijina diê dikola.

²² O henda ié, Jihova, i kale ku thandu dietu; ua tu mono, eie-muène tua ku kinga.