Jisálamu 31 - O Mikanda Ikola

Ku di Tenda, Ni ku di Bhakula Bhu Maku Ma Nzambi

Ua Mesene Ngimba. Mukumbi ua Davidi.

¹ Ko kué, u Jihova, ku nga lengela; ku ngʼehele kukakuka! ngi bhulule, Ngana, mu kubatula kué kua kidi.

² Ngi bhetekele o mátui mé, endelà-ku, Ngana, mu ku ngi bhulula; u ngi kale u ndánji iami iakolo, u di bhange mbonge ia nguzu i tena ku ngi kudila.

³ Kuma eie u Ditadi diami dia kipena, u Kimbaka kiami; kiene ki nga ku bhingila, mu dijina dié, u ngi tambule konda u ngʼidikize njila.

⁴ Ngi sukunune mu uanda ua ngi tela manhanga; nga ku dielela eie ku ngi bhana o muenhu.

⁵ Nzumbi iami nga i bhakula bhu maku mé; Jihova, u Nzambi ia kidi, eie ua ngi kula.

⁶ Enhó a ku kuma oso a landukila o iteka; eme bhabha-phe ngi dielela kua Jihova.

⁷ Ngi sanguluka, ngi kala ni kutana mu kulenduka kué; kuma eie ua ngi xinganeka mu kubhindama kuami; eie ua ngʼijidila mu jiphaxi mu nga bhiti.

⁸ Kua xikina ku ngi bhakula bhu maku a nguma; uemika inama iami bhu kididi kia zanze.

⁹ Ngi kuatele henda, u Jihova, kuma nga tâte; mesu ami a jila ni dilamba, katé ni nzumbi iami ni mukutu.

¹⁰ Kuma o muenhu uami uala kubhuila mu mukondo, o mivu iami i ibhua ngó ni kukema; nguzu ia ngi bhu ni kuteketa, kingumba o malamba; mukonda dia kutondala kuami, ifuba ia ngi sokomoka.

¹¹ Enhó a ngi zembe, a ngi mono kusekala; akua bhata ala ku ngi ta môndo; katé ni makamba mami a ngi kuata uoma, kia ngi mona mu nzunga, a ngi lenga.

¹² Mukuâ ni kimbi kiófunde, athu ka ngi te dingi muẋima; a ngi kita ngi ímbia iabudika.

¹³ Ku athu-athu ngʼivua kufueta kua mundu ala ku ngi longolola, ngiia ni kusasumuka ku mbandu joso ni uoma; kuma enhoso ala ku ngi kanena eme, a te kikutu kia ku ngi katula o muenhu.

¹⁴ Maji eme-phe, nga dielela ko kué, u Jihova, ngixi: Eie, eie u Nzambi iami.

¹⁵ Mukonda o ithangana iami iala bhu maku mé; ngi kudile bhu maku a jinguma jami, ni kua ió ala ku ngi zuididika.

¹⁶ Pholo ié i kale ni ngalasa, ko kuami ngi mubhikʼé; ngi bhulule mu kulenduka kué ku uene na-ku.

¹⁷ Kana ku ngi kakula, Jihova, tata! mukonda nga dikola ko kué; a kakuke o isuéia ienʼoio, ele muene hudí mu mbila.

¹⁸ A bhane ububu, oso ala ni mizumbu i tanga makutu; akua kuhina-hina mu longolola o muthu ua iuka, anga a mu bhanga kasekelu, aia ni ku mu kenha.

¹⁹ Jimbote jé kuvula kuahi, Ngana! Ji ua lundila oso a ku kala ni uoma; ji u bhanga jinga athu oso a lengela ko kué, bhu pholo muene ia anʼaathu mu ngongo!

²⁰ Kuma hinu eie u a sueka kididi kiakondama, bhu mbandu ia kinama kié, mukua kukanena phulu ka a mono dingi; eie u a bhaka muene mu balaka ié, kevu dingi jimvunda ja kutangelela.

²¹ Jihova a tane-ku! Kuma henda iê ia madiuanu, ia ngʼidikiza mu kubhondalala kuami.

²² Nga zuela ngó lusolo, kia ngi kuata hele, ngixi: Eme nga fu-ó, ku mesu mé nga-nda kubhua-ku! Maji kiene kimoxi, eie ua ngʼivu dízui kioso ki nga dikola ko kué.

²³ Jihova mu zodienu, enu oso mu athuʼê ósole; kuma Ngana u tambula konda ia jifiiele. Maji akua izala-phe u a bhesa kaxtiku kasoko.

²⁴ Kolenu maku, miẋima ienu i kale ni nguzu iobhe, enu oso mua dielela kua Jihova.