Jisálamu 30 - O Mikanda Ikola

Kusakidila Nzambi Ua tu Bhulula ku Kalunga

Muimbu a u imba mu kulumbila Ngana inzo iê. Mukumbi ua Davidi.

¹ Nga zangeleka Jihova, mukonda eie ua ngi zangula; kuehela jinguma jami ku ta kikóue, kuila a ngi lende.

² Jihova, Nzambi iami, nga dikola ko kué, phala ku ngi banda, eie-phe ua ngi sake.

³ Ua ngi vutula, Ngana, mu kina mu ngambele kuia; eie ua ngi bhake hanji ku muenhu, kuma kuia mu bombo dia kalunga kua ngi kambele ngó!

⁴ Imbenu, mu ximane Jihova, enu atuʼê ósole; sakidilenu mu kuxinganeka o kukola kuê.

⁵ Kuma o kutema kuê, ku nanga ngó kithangana; o kulenduka kuê ku bhixila bhu suka o muenhu ua muthu! Né-mbe mu usuku, ki ku vunda, tua didi masoxi, kusanguluka-phe kuiza ni kimene.

⁶ O ki nga kexe mu kubhanduluka, nga zuela jinga ngixi: Ki mungu dingi, ngi mona hadi!

⁷ Mukonda eie, Jihova, ua ngi bhake kididi, ua ngi fikidila kala mulundu; maji o ki uedi-phe, u sueka o pholo ié, kutata kueza, nga bhondalala!

⁸ Bhenhobho ngi dikola ko kué, u Jihova; ngi kala mu dionda muene kua Ngana.

⁹ Eie, Ngana, u katula-ku ihi se eme nga fu, o muenhu uami ni u di boto mu dikungu? Manhi, o mavu, a tena dingi ku ku ximana? Mavu a tena dingi kutanga o kukumbidila kué?

¹⁰ Ngʼivue Jihova, u ngi kuatele henda; Ngana iami, kala u dikuatekesu diami.

¹¹ Kudila-phe eie ua ngi katula-ku, mua ngʼiza kukina! ua ngi zula o kidiniaji, eie ua ngi kembesa ni ngalasa.

¹² Phala o muenhu uami u ku imbile jinge o diximanu, ki ngi dixibhe; u Jihova, Nzambi iami, eme ngi ku bhana jinga jiphembele izuua ioso sé kuzumbuka.