Jisálamu 29 - O Mikanda Ikola

Unéne ua Nzambi ua Dʼidikiza Mu kibhungu

Mukumbi ua Davidi.

¹ Bhakulenu kua Jihova, enu mu anʼa mazonda; bhakulenu kua Jihova mukua fuma ni nguzu.

² Jihova mu tumbuidienu o fuma ia tokala dijina diê; Jihova mu sambedienu mu izuatu iazele, ia uabha.

³ Dízui dia Jihova di bhita ku thanduʼa menha; Nzambi uene ni kubenha, u numina; Jihova ua xikama ku menha mavulu.

⁴ Dízui dia Jihova kutena kuahi ngó! dízui dia Jihova diezala unéne!

⁵ Dízui dia Jihova di bukula o mixi ia misédulu; xi, Jihova u bukula muene mixi ia muxitu ua Libano.

⁶ U bhangesa milundu kutuka-tuka, mukuâ ni monʼa ngombe; ni Libano ni Sidiione a di bhanga kala anʼa jiphakasa,

⁷ dízui dia Jihova di uana túbhia mu jiphandanda.

⁸ Dízui dia Jihova di teketesa o kikangalakata; Jihova u tungutisa muene kikangalakata kia Kadexe.

⁹ Dízui dia Jihova di bhangesa kuila jimbâmbi ji vuala o tuana! Dízui dia Jihova di bhangesa kuila mixi ia matutu ku mikáu i zuluka; o mu Tembulu iê ene oso a dikola, exi: Ukolʼé!

¹⁰ Jihova ua xikama bhu kiandu kiê kia bhita o dilúvio; ni kiki hanji ueniê ku ungana, o mivu iê ki ià bhua.

¹¹ Jihova muene u bhana o nguzu ku mundu uê; Jihova u zediuisa o mundu uê ni kutululuka.