Jisálamu 27 - O Mikanda Ikola

Mukumbi ua Davidi

¹ Jihova muene umuikinu uami, ubhulukilu uami; ngi kala-phe ni uoma ua nanhi? Ngana muene ua ngi bhana o nguzu ia kukola muenhu, uebhi-phe ngi mu kala ni hele?

² Kioso akua phulu, jinguma jami ja ngi kàla ni ufe, ki ejiie phala ku ngi dia xitu, a di bhukana, a di vundu bhoxi.

³ Né-mbe kifuxi kia ngi bhake mu kaẋi, muẋima uami ki u kala ni uôma; né kua ngi vubuka ita mu ku ngi lua, hanji, ngi dielela kua muene.

⁴ Kima kimoxi ki nga bhingi kua Ngana, kiene ki ngi bhindamena jinga: o kutunga mʼonzo ia Jihova izuua ioso ia muenhu uami, mbé kutala o kuuabha kua Ngana, ni kudilonga jinga maka mu Tembulu iê.

⁵ Kuma bhu kithangana kia jingongo, muene u ngi bhaka mu kitelembe kiê, u ngi sueka muene kididi kia kondama mu balaka iê; u ngi tudika ditala dialebha kuthandu a matadi.

⁶ Ki bhangesa mútue uami u bhetuka, jinguma ja ngi bhindamena ngʼa muena ngó bhoxi; anga ngi bhana mu balaka iê jisata ja kusakidila; ngimba mikumbi, ngi sanguluka mu kuximana Ngana.

⁷ Ivua, Ngana, o dízui diami ki ngala kudikola; ngi kuatele henda, eie u Nzambi, u itaie.

⁸ Kioso eie ki uambe, uixi: Sotenu pholo iami; eme muẋima uami uambe: Pholo ié, Ngana, ngi i sota.

⁹ Kana ku ngi suekela o pholo ié. Ngi mubhikʼe, kana ku ngi kaia ni njinda; ua ngi kuatekesa jinga mʼokulu, ni kiki kana ku ngʼambudisa, kana ku ngʼehelela, u Nzambi iami ia kibhamuenhu!

¹⁰ Mukonda kioso o tatʼetu ni mamʼetu kia ngʼehelela, Ngana muene u ngi tambulula.

¹¹ Ngi longe, Ngana, o njila é, u ngʼendese mu ikoka iatu, ki iala ni kubhengalala, mukonda dia jinguma a ngi batamena.

¹² Kana ku ngi bhakula, Ngana, ku jinguma jami ene ni a ngi bhange kioso ka mesena; kuma sai iá a di xikina umbangi ua ku ngi tatela makutu, sai-ku a ngi hamena muene kala iama.

¹³ Ngeje kuzônda se nga kambele kudielela o kumona hanji jimbote ja Ngana, kulu dia mundu kunu.

¹⁴ Ngana, se kua mu mono, mu kinge; kolokota, muẋima u kuate nguzu iobhe; nga ku ambela muene, Ngana se kua mu mono, mu kinge.