Jisálamu 26 - O Mikanda Ikola

Musambu ua Muthu Uaiuka

Mukumbi ua Davidi.

¹ Ngi lúngise, Ngana, ua ngi mono o kuenda kuami, ki nga bhalumuna mulonga; nga dielela muene kua Jihova, sé kuvula ilunji.

² Ngi tokuese, Johova, u ngʼijiie; ngi tekule muẋima ni ilunji.

³ Kuma o henda ié nga i bhake muene ku mesu; kidi kié kiene ki ngenda jinga na-kiu izuua ioso.

⁴ Akua makutu ki ngi xikama-nâ; ki ngi xikina ku di ta kumoxi ni akua mangonha.

⁵ Junda ia ati a ituxi, ia ngi iibhila, bhu nangu dia isuéia ki ngi tuia-bhu.

⁶ Maku ami nga a sukula, katé ki azele; phala ngi kondoloke kalatódio ké, u Jihova.

⁷ Ngi suina dízui ni ku ku sakidila; ngi tubhula fuma ia ikalakalu ié ia madiuanu.

⁸ Jihova, inzo ié ia ngi uabhela muene; kuma kiene kididi bhu ua tukuluila o kubenha kué.

⁹ Kana ku ngʼambata o muenhu uami ni akua ituxi kumoxi; muenhu uami ki u di bote ni ijibhanganga.

¹⁰ A bhingi makuʼâ a di teka ni usuéia; o kitadi kia kuzuela makutu a ki kuata dikumba.

¹¹ Eme-phe nga mesena ki ngi kala ni ikuma; ngi kudile bhuoso bhu nga tatela, u ngi kuatele henda.

¹² Kinama kiami kia kuata kiá mu njila iasokelela; ngi benzela Jihova mu kionge kia akuetu.