Jisálamu 25 - O Mikanda Ikola

Musambu ua Kubhinga Dikuatekesu dia Nzambi

Mukumbi ua Davidi.

¹ Ko kué Ngana, u Jihova, ku nga bhetukila.

² Nzambi iami nga ku dielela, kana ku ngi kakula, kuehele jinguma jami ku ngi tolola!

³ Kana bá! oso a ku kinga eie ka tena kukakuka; a kakuka kikale ió a baluka ni kubhuma.

⁴ Ngʼijidise jinjila jé, u Jihova; ngi longe o uendelu ué.

⁵ Ngʼendese, u mukua kukumbidila o kidi; ngi longe, u Nzambi iami ia kibhamuenhu; kumbi dioso dia kambamba ngi kinga kokué.

⁶ Xinganeka, Jihova, jihenda jé ni jimbote jé; mukonda jene ji uene na-ju tunde dia tunde.

⁷ Kana kuxinganeka kuzangata kuami kua undenge; mba u kaiela o itondalu iami, né nga ku bhukumukina, ngi kuatele henda mu kiadi kié, u Jihova.

⁸ Jihova muthu uambote, o kuiuka kuvula; kiene kia tenena kulonga akua ituxi o njila.

⁹ Abelesela u a endesa ni kutetuluka; o alenduka u a edikiza mu njila iê.

¹⁰ Jinjila ja Jihova jene joso ja henda ni kidi; muene u di tuma ni ió oso a kuata kikutu kiê ni maumbangi mê.

¹¹ Nga ku diondo, mu dijina dié, u Jihova, ngi loloke o kubhukumuka kuami, mukonda kuavulu!

¹² Muthu uebhi uene ni uoma ua Jihova? Muenhó Jihova u mu longa njila ia fuama kusola.

¹³ Muthu u kala kiki u tunga bhua tululuka; mbutu iê ia vuala iene i lundula ixi.

¹⁴ Ukamba ua Jihova u kala ni akua uoma uê; u a ejidisa kioso ki kala kikutu kiê.

¹⁵ Mesuʼami a kala jinga kua Jihova; kuma muene u ngi sukununa inama mu uanda.

¹⁶ Ngi bhane Ngana o pholo, u ngi kuatele henda; kuma ngala ubheka, nga tate!

¹⁷ Moxiʼa muẋima mua ngi kala malamba; ngʼendese u ngi katule mu jiphaxi.

¹⁸ Xinganeka o kukenanana kuami, ni kubhondalala kuami, u ngi loloke o ituxi ioso ia ngi nemena.

¹⁹ Tongolola o jinguma jami, kuma javulu; a kaka miẋima ni ku ngi zemba ni kizembu kia dikota.

²⁰ Ngi kudile, Ngana, u ngi bhane muenhu; ku ngi kakule, nga lengela ko kué.

²¹ Kuiuka kuami ni kutetuluka ku ngi konde mbandu ni mbandu; kuma eie-muène, Ngana, nga ku kinga.

²² Nzambi iami, kula Izalaiele mu jiphaxi jê joso.