Jisálamu 24 - O Mikanda Ikola

Nzambi Muene Muenexi Uavu o Kijingo

Mukumbi ua Davidi.

¹ Ixi iangene ia Jihova ni jimbongo mu ngongo jê; mua mu tokala muene ni mundu uoso ua tungu-mu.

² Mukonda muene ua xikika o ixi muʼaxaxi ka menha a kalunga; iu ua i kuatesa ni jingiji jezala menha.

³ Nanhi ua kà banda ku mulundu ua Jihova? Nanhi ua kèmana bhu kididi kiê kiangene?

⁴ Uoso makuʼê a mu zele, o muẋima uê uabhu ufusa; ua kambe kukaiela ulalu, ka xikina kuloka mu kunganala mukuá.

⁵ Muenhú muene o muthu u tambula dibesá dia Jihova; a mu bhana ue kulúnga kuala Nzambi iê ia kibhamuenhu.

⁶ Iú uene o muiji ua athu ene ku mu kenga muene; ene ene ni ku ku sota o pholo, eie u Nzambi ia Jakobo. (Selah.)

⁷ Zangukenu mítue mu mabhitu a kimbaka, o mielu iê iókulu-kulu i jikuke, muenexi uavu o kijingo phala a bokone.

⁸ Muenexi uavu o kijingo mukuahi? Jihova mukua nguzu, o kindanda; Jihova, o dizonda ku ita.

⁹ Zangukenu mútue mu mabhitu a kimbaka, o mielu uê iókulu-kulu i jikuke, Muenexi uavu o kijingo phala o muene bokone.

¹⁰ Muenexi uavu o kijingo mukuahi? Jihova u tumina o ifuẋi, muene o muenexi uavu o kijingo. (Selah.)