Jisálamu 22 - O Mikanda Ikola

O Jiphaxi ni Ufilu ua Mexiia

Ua Mesene Ngimba. Mbimbi iê ia Mbâmbi ia Kimene. Mukumbi ua Davidi.

¹ Nzambi iami, Nzambi iami, ua ngʼehelelela-hi-á? Ua sukila-hi ngó mu kanga, ni kufula ku ngi kudila, ngala kudikola kiki?

² Nzambi iami, tata, ngala kuila ngi dikola mu muanha, eie-phe kua ngi suu; ni mu usuku ngi dikola, ki ngene kudixibha, maji eie ku ngʼivu.

³ Eie-phe, Ngana, u kôla, ene ku ku ximana kuala Izalaiele, bhu kiandu kié bhu ua xikama.

⁴ Jitata jetu ja ku dielela jinga; a ku dielela jinga, eie anga ua a kudila.

⁵ A dikola jinga kokué, eie anga u a bhandulula; o kia ku dielela jinga, eie-phe kua a kakula, kana.

⁶ Eme-phe ngi kabamba ngó, ki ngi muthu, kana, a ngi tobhesa kuala athu, a ngi tènde kuala o mundu.

⁷ Oso a ngi mona a ngi bhanga kasekelelu; a buetula mizumbu, a bhuka ku mútue, exi:

⁸ Ua di fiiala Jihova, kiki a mu kudile-phe; a mu bhulule, kuma muthu uê ua mu uabhela kiambote.

⁹ Eie-muène-phe ua ngi katula mu divumu; eie ua ngi dielelesa kioso ki ngala hanji ku mele a mamʼetu.

¹⁰ Eie-muène ua ngi tambula konda tunde mu mala; eie u Nzambi iami tunde mu vumu dia mamʼetu.

¹¹ Kana ku ngi kala dikanga, kuma kubhondalala kua ngʼiza bhua zukama, o u ngi kudila dingi, ka moneka.

¹² Iama iavulu ia ngi balukila ni ku ngi tungika, jindumbe ja jingombe ja ngi bhake bhu kaẋi.

¹³ A ngi hamena ni ku ngi bhanena mu kanu, exi ni mazu kenené, mukuâ ni hoje i sana-sana iala mu zuma.

¹⁴ Nga ẋamuka kala menha, ifuba iami ioso ia ngi sokomoka; muẋima moxi ua ngi botomoka, ua sengumuka muene kala sela.

¹⁵ Bhu xingu bhua ngi kukuta kala kimènga kia mavu; dimi dia ngi naminina ku jinganzuánzua; ua ngi takuila mu fufutila ia mavu a kalunga.

¹⁶ Kiene ki ngalʼiki, jímbua ja ngi kondoloka; kibuka kia ingumba kia ngi phopheka, a ngi kubula o maku ni inama,

¹⁷ ifuba iami ioso i xikina muene ku i tanga! Ene-phe ia a ngi tala, ala ku ngi toka mesu.

¹⁸ A uana mudiá o izuatu iami, divunga diami a di tela jisorte.

¹⁹ Maji eie-phe u Jihova, kana ku ngi kala dikanga; endela-ku, Ngana, mu ku ngi banda, u mubhuludi uami.

²⁰ Ngi kudile ku mukuale ua ngi zuikila; muenhu uami umoxièlele ki uie ni jímbua.

²¹ Bhu ngalʼabha, ngi tambule mu kanu dia hoje; xi, ngʼivile muene ku jimbinga ja jiphakasa ku ngala.

²² Kienhókio, ngi tumbula-phe o dijina dié ku jiphange jami; ngi ku ximana bhu kionge bhua bhongoloka o mundu.

²³ Enu mu akua uôma ua Jihova, ndokuenu mu mu ximane; enu oso mu mbutu ia Jakobo, mu tangienu o fuma; mu ẋidienu, enu mu mbutu ioso ia Izalaiele.

²⁴ Kuma muene kene kutènda muthu, mba kuxikulula ngadiama mu uadiama uê; uatate ka xikina ku mu suekela pholo, nʼa mu bhane dikunda; maji kia dikola kua muene u mu ivua.

²⁵ Eie-muène nga ku te thâthe bhu pholo ia athu avulu; kioso ki nga loko, ngi ki kumbidila bhu pholo ia akua uôma ué.

²⁶ Akua ujitu a kà dia muene ku fesa, anga ekuta; oso ene kusota Jihova, a mu ximane; tanenu-ku, o miẋima ienu i di sanze katé ku hadia!

²⁷ Katé ku maẋokololo a jixi athu a xinganeke, a vutuke kua Jihova; mbutu joso ja athu, eze a bheze bhu pholo iê.

²⁸ Kuma ungana uangene ua Jihova; muene ua tokala ku tumina akua jixi joso.

²⁹ Ni iá anete mu ngongo, a kà dia anga a bheza; ni ió oso a tunuka kiá mu mavu, a kà diunda bhu pholo iê, katé ni ió kua mu kambe ngó kuzubha, nʼeha muenhu uê.

³⁰ Bhu kala-phe mbutu a di tuma ni Ngana; a kala mu ku mu bhikila, ni kutumbula Jihova, katé muiji ua kéza-ku a mu ijiia.

³¹ A kala mu tumbula o kukumbidila kuê, phala athu kiluua a a vuala a kʼivue, kuma kiene kia bhanga jingʼiki.