Jisálamu 2 - O Mikanda Ikola

Matumbu a salumukina Nzambi Ni Kristu iê

¹ Phala-hi matumbu a salumuka kiki, madiembu ma fika kubhanga kimbamba kia ku di metena?

² Jisobha mu ngongo ja di bhongolola, makota ma di longesa jindunge, phala ku kitukila Jihova, ni muthu uê ua mu undu ni maji.

³ Exi: Tu katule ophi iâ mu xingu ietu, o mikolo iâ tu di zudienu-iu.

⁴ Ió ua xikama ku maúlu ua olela; Ngana anga u a bhanga kasekelu.

⁵ Kindala u a temena ni njinda, hé u a bhuuika mu kuluuala kuê.

⁶ Eme-phe, sobha iami nga muʼundu bhu kididi, ku mulundu uami ukôla ua Ziione.

⁷ Ki ngʼedi ngi kola ngonge, Jihova ua ngʼambela, uixi: Eie u monʼami, lelu muene nga ku vuala.

⁸ Ngi bhinge, phalʼeme ngi ku bhane akua jixi ku avua, a kale undundu ué, katé ku maẋokololo mu ngongo.

⁹ U a tolola ni mbangala ia felu; u a bhanga imenga-imenga kala ímbia ia mavu.

¹⁰ Kiki-phe, enu mu jisobha, kuatenu kilunji; ivenu phangu, enu mu afundixi mu ngongo.

¹¹ Kota mu toloke kua Jihova, mu kale ni uoma uê, mu kale jinge ni kutana ni kuteketa.

¹² Bhombenu mona, ki mu kinge kia thathamana; kuma hinu mu diuana ku muia, njinda iê ki i uama kala túbhia. Enhó-phe a zediua oso a dielela kua Muene.