Jisálamu 19 - O Mikanda Ikola

Kuximana Nzambi Ua Bhanga Ioso, Ni Kuuabha Kua Maka Mê

Ua Mesene Ngimba. Mukumbi ua Davidi.

¹ Maúlu ma tumbula o fuma ia Nzambi; o mu dinga ni dinga mua dʼidikiza o ufunu ua maku mê.

² Kizuua ki tangela o kizuua kia mukuá imʼiii, o usuku u ijidisa ku usuku ua mukuá!

³ Kibhuala kuzuela ku tunda bhu dimi, kana-bhu dízui di uivila mu dítui,

⁴ maji o njimbuʼiii-phe a ivisa mu ngongo ioso; o hundu iê ia jimbuluka muene katé ku maẋokololo maʼxi. Maúlu Nzambi ua ma bhanga balaka ia dikumbi;

⁵ Diene, mu kutunda kuê, kífua muene naʼiala u tunda mu xilu dia ubhanga; di sanguluka muene kala dizonda dia di fiiala kulenga dikanga dia mu xindi.

⁶ U katuka bhu muxinda uaʼxi ni diulu, u banda, hé u boloka, katé ku mbambe iê, tulé; kana-ku kima ki suamena o muanha ue.

⁷ Ngonge ia Jihova ia di uabhela, i bhekela muthu muenhu uobhe; umbangi ua Jihova ua kidi, u ijidisa atobho.

⁸ Ijila ia Jihova ia tetuluka, i bheka ngalasa ku muẋima; kitumu kia Jihova kiazele, ki muikina o mesu.

⁹ Uoma ua Nzambi ua ujitu, ua kenzuluka, ki u tena dingi kubhua-ku; o mabatuilu ma Jihova ma kidi, ma sokela, o mene moso ma iukila kumoxi.

¹⁰ Maka mê kota mu kuta, o ulu ndenge, né ulu uavulu ua fina; mu kutouala ue kota, o uiki ndenge, né uiki u zunzumuka ku kixila.

¹¹ Mene ma dimuna selevende ié, o kia kuata ku a aiuka kubhanduluka kuê ku vula.

¹² Nanhi u tena ku di tongolola o isenga iê-muêne? Ngi loloke, Ngana, o ikuma ioso ia ngi jimbi eme-muène.

¹³ Selevende ié, Ngana, mu fudise o kubhuma kua izala; o ima ia ku di zangeleka ki iende ni ku ngi tumina; phala ngʼimane nzanza ni kulunga, mbé ki ngi kale ni kituxi kia dikota kokué.

¹⁴ O kuzuela kuami kua dikanu, ni kubanza kuami kua muẋima, ku kale kuoso kua ku ku uabhelʼeie, u Jihova, u Nguzu iami, u Mukudi uami!