Jisálamu 18 - O Mikanda Ikola

Kuximana Nzambi

Ua Mesene Ngima. Mukumbi ua Davidi, selevende ia Jihova, u tela Jihova maka moso ma muimbu iú, kizuua kia mu kudila Jihova bhu lukuaku lua jinguma jê joso, ni bhu lukuaku lua Saúlo, uixi:

¹ Eme ngi ku zola ni muẋima uoso, eie u Jihova, u nguzu iami.

² Jihova muene ditadi diami dia kipena, muene mbonge iami ia ku di kondela, kilolo kia ku ngi kudila; muene Nzambi iami, mbonge iami, nga dielela kua muene; muene ngubu iami, lumbinga lu ngi bhângela, ditala diami dia di leka.

³ Ngenda ni kudikola kua Jihova, ua fuama o ku mu ximana; kiene ki ngi bhulukila ku jinguma jami.

⁴ Mabhuku a kalunga a-lu sota ku ngi bobesa, masenza ma kubhuma mambe ku ngi kungulula.

⁵ A ngi louele mikolo ia ku ngi sungila mu bombo dia kalunga, manda ma manhanga ma ngi batuluile kû pholo.

⁶ O mu kubhondalala kuami anga ngʼixana Jihova, ngi dikola muene kua Nzambi iami; muene anga u ngʼivua dízui tunde mu Tembulu iê, kudikola kuami kua mu bhixila mu mátui.

⁷ Bhenhobho ixi i tunguta, hé i teketa; madisesa ma milundu ma setuka bhu kididi; kua teketa mukonda njinda ia mu kuata.

⁸ Mu mazulu mê mu fuafua dixi, o mu kanu diê mu tuka túbhia tuia ni kuaúla; tu uika muene makala.

⁹ Diulu ua di bheteka iu ua tuluka; o bhoxi dia inama iê kitombe kʼila muene bui.

¹⁰ U endela ku xelube, u tuka hé u bhita bhulu, u diona ku mabhabha ma kitembu.

¹¹ U di vunga kitombe, kifua balaka ia kusuamena, matuta ma mvula mʼezala menha maxiti, mavundu.

¹² O kubenha kua pholo iê, ku muanga matuta, a di bhanga matadi a mvula, ni makala ma túbhia.

¹³ Jihova anga u numina ku diulu, Suke-ku u bhana mutendu, hé ku kala matadi a mvula ni makala ma uama túbhia.

¹⁴ U asa mifula iê, hé u a muanga, nzaji i telajaka katé a bhuuama.

¹⁵ Koxi a menha anga ku moneka ni kioso ki enda jihonga jê, kibumu kia xala mu kanga katé ku disesa diê, mukonda dia kubazela kué, u Jihova, mukonda dia muha u fuafua mu mazuluʼé.

¹⁶ Nzambi lukuaku luê ua lu sunununa muene tunde ku diulu kuala; iu ua ngi kuata, íu ua ngi sunga, nga bhondalala mu menha mavulu.

¹⁷ Ua ngi tambula ku nguma iami iasuina kinéne, ni ku athu a ngi zembe, mbata ene a ngi tundu mu nguzu.

¹⁸ Kuma ene a ngi tuuama mu kizuua kiami kia uíndua; maji Jihova-phe muene ua ngi bande.

¹⁹ Ua ngi bheka ue kididi kiadisanze; ua ngi kudidla, mukonda nga mu uabhela.

²⁰ Jihova ua ngi bhange kia tokala mu kulunga kuami; ua kaiela makuʼami a hatu, ka ngi kuata ni kima.

²¹ Kuma nga kuata muene jinjila ja Jihova, Nzambi iami ki nga mu xibhaka hé ngi baluka.

²² Mbata ima ioso ia tendelela, eme nga i bhake muene ku mesu; ijila iê ki ngi i texe kuema, kana.

²³ Ka ngi mono ue ni miẋima iiadi bhu pholo iê, nga di lange muene phala ki ngi te kituxi.

²⁴ Jihova kiene kia ngi bhangela kia tokala mu kulunga kuami; ua kaiela kuzela kua makuʼami a hatu, ku mesu mê.

²⁵ Mukua henda, eie ue u mu idikiza henda; ua tetuluka, eie u ku mona kutetuluka.

²⁶ Ua di zelesa, eie u ku mona kuzela; muthu uaiibha eie u ku mona kuiibha, kuma ku xikina ku mu ehela.

²⁷ Mukonda athu a tate, eie u a bhulula; maji o ió a tundu mesu ni izala, eie u a bhekela kusebuluka.

²⁸ Jihova u ngi bambuila kandeia kami, o mu usuku mu ngi bhita, Nzambi iami u ngi zelesela-mu.

²⁹ Kuma mu nguzu ié, Ngana, ngi kaia ilômbo ia jinguma, mu kutena kua Nzambi iami ngi tuka imbaka.

³⁰ Nzambi, o uendelu uê, kutetuluka kuoso; maka ma Jihova ma di kenze, kala ni dixilu; muene ngubu ia kuxitila oso a di tuma-nê.

³¹ Kuma Nzambi iengi iebhi, oko Jihova muene ngó kuabhu? O ditadi diengi diebhi, u mu fika ni Nzambi ietu?

³² Nzambi muene ua ngi bhana o ukuenze, muene mukua ku ngi xitunuina o njila iami.

³³ U bhangesa inama iami i soka ni ia hoha; ngi kanduka ididi ia di leka.

³⁴ Ua longo makuʼami kubhânga ku ita; uta ua mufula ua utadi ua nguzu, nga soko-bho ku u fumba.

³⁵ Ua ngi bhana ue o ngubu ia ubhulukilu ué; ngʼemana mukonda lukuaku lué lua ngi kuata; o ku dʼivua ni eie kuene kua ngi bhana kijingo.

³⁶ Ua ngi bhana kuta makanda ma nguzu; bhoso bhu nga diota ki ngi xangumuka.

³⁷ Jinguma jami nga ji kaie, nga ji kuata; ki ngʼaluluka dingi katé ki nga ji buidisa.

³⁸ Nga a beta-beta, ka tena dingi kubalumuka; a di bhalela bhoxi dia inama iami.

³⁹ Kuma eie ua ngi kutu ni nguzu ia kubhânga; ua ngi lendesa ku a tolola ió oso a ngi balukila.

⁴⁰ Jinguma jami eie ua ji bhesa lusolo; oso a ngi zembele eie ua a jimi o mbutu.

⁴¹ Edile tu dikola, u a bhulula ka moneka; a di kola katé ni kua Jihova, muene-phe ka a suu.

⁴² Bhenhobho nga a fufujula, a phephuluka ni kitembu; nga a titidila kala mavu a malôua mu nzunga.

⁴³ Eie ua ngi kudila mu jimvunda ja mundu; ua ngi bhangesa kukala ngi mútue ua akua matumbu; kifuẋi kia athu ki nga ejidile, ala ku ngi bhikila.

⁴⁴ A ngʼivu ngó fuma, iá eza kiá ku ngi belesela; akua makanga eza ku ngi diundila.

⁴⁵ Enhó akua makanga, kia ngi mona, a lela kala iangu; eza ni kuteketa a fomoka mu jimbonge jâ.

⁴⁶ Jihova u kôla; a tane-ku, ditadi diami! a zangalale, Nzambi iami ia kibhamuenhu!

⁴⁷ Muene Nzambi ua ngi bhela-nâ kaxtiku, ua bateka ifuẋi phala ngi kale ku thandu diâ.

⁴⁸ Muene ua ngi kudila ku jinguma jami, ua ngi bhake ditala, ene ka tena-bhu, oso ala ku ngi sota; ua ngi tambula ku kiiala kiasuina.

⁴⁹ Mukonda dia kiki, nga kà ku ximana Jihova, muʼaxaxi ka akua jixi; dijina dié ngi di ximana muene ni kuimba.

⁵⁰ Kutolola kua nzungule kua bhana sobha ié ua mu te ku ungana; jihenda ji vula jʼedikiza kua muthu ué ua mu undu ni maji; kua Davidi ni mbutu iê, ku thembu sé mbambe.