Jisálamu 17 - O Mikanda Ikola

Musambu ua muthu uaiuka, mbé a mu kudile ku jinguma ja suina

Musambu ua Davidi.

¹ Ivua, Ngana, o kidi, u Jihova tatuʼodio. Bhulakana musambu uami, ua ngi tundu ku mizumbu sé ngó makutu.

² Mulonga uami nga kinga eie ku u batula; mesu é a tongolole ioso ia tokala mu kuiuka.

³ Eie ua lola kiá muẋima uami; ua ngi tokuesa mu usuku; ua ngi sale, maji kua ngi mono isenga; nga dixibhʼami, kanu diami ki dia tondala.

⁴ Muʼaxaxi kʼathu ngi banza jinga o maka a tunda ku mizumbu ié; njila i bheka athu mu kubaluka nga fulu ku i enda.

⁵ Makànda mami ma kuata mu ikoka ié, o inama iami ki i dianguka, kana.

⁶ Nga dikola ko kué, kuma eie Nzambi, u ngi suua; bhetamena dítui dié kokuami, u ngʼivue kuzuela.

⁷ Idikiza jihenda jé ji diuanesa athu; eie u mukua ku a kudila ku iiala, oso a lengela bhu mbandu ié.

⁸ Ngi xitile, Ngana, kala ngi mona diesu; ngi sueke moxi a mabhabha mé,

⁹ akua phulu ka ngi mone, a mesena ku ngi dia; ni jingumʼojo a ngi kondo mbandu ni mbandu.

¹⁰ Enhó a bumbu ni kuneta, kʼevu kima; maka ma dikanu diâ ma izala ioso.

¹¹ Kuoso ku tu di tela, iá eza ni ku tu tola manhanhu, mesuʼâ a tundu ni kusota ku tu tukila, phala ku tu vunda bhoxi mu ku tu jikinisa.

¹² A di fangana kala hoji i hamena kúdia mbole; a soko ni munzangala ua hoje ua batamena mu kisasa.

¹³ Balumuka, u Jihova, u mu kakule, u mu tolole; ngi tambule ni mukuale ué, kua ió ua kakela o muenhu uami.

¹⁴ Lukuaku lué lu ngi kudile, u Jihova, ku athu ió ejiia ngó ima ia mu ngongo mumu; kabasa ekuta mu mala ni makudia ma tundu ko kué, a kala ni umonhi ua kuxila anʼâ.

¹⁵ Eme-phe nginda ngi mona pholo ié ni kulúnga; muẋima u ngi zela, hinu ki ngi phaphumuka, mu kutala o kidifanganu kié.