Jisálamu 16 - O Mikanda Ikola

Nzambi muene otho ia jimbote joso

Mixami ia Davidi.

¹ Ngi kondeke, eie u Nzambi, kuma nga di umbu ko kué.

² Ngambe ku muẋima uami, ngixi: Jihova, eie u Ngana iami; mbote ki ngi i dielela kuengi, kana; ngi i dielela ko kué.

³ Athu é angene, abhu o ituxi, ene athu a ujitu nga endi mu ngongo.

⁴ Malamba mâ mʼaia ni kusokoloka, oso a bhakuila nzambi iengi; kiamenga kiâ eme ngi dituna ku ki bhana, majina mâ ngó ki ngi xikina ku a tumbula ni mizumbu iami.

⁵ Jihova muene u kala undundu uami, muene kimanga kiami; kubhanduluka kuami ku tunda bhu maku ma muene.

⁶ Mu kuxinda jimbambe, eme a ngi bhana kibatu kiambote; èuá! nga tambula undundu ua uabha kiavulu!

⁷ Nga sakidila Jihova ua ngi bhana phangu; katé ni muẋima mu usuku ua ngi longo kilunji.

⁸ Jihova izuua ioso nga mu bhaka bhu pholo iami; o mukonda dia muene ku ngʼimanena bhua zukama, ki bhuala u tena ku ngi lundumuna.

⁹ Kala kiki, muẋima uami ua tana, dimi diami dia sanguluka, katé ni xitu iami hinu i kala bhua kondama.

¹⁰ Kuma eie ku xikina kuehela muenhu uami kuʼalunga; muthu ué ua mu solo kà kala mu sekumuka.

¹¹ Eie u ngʼidikiza njila i bheka kuala muenhu, kuala kusanguluka kua mbote bhu pholo ié; o ku lukuaku lué lua kúdia sai-ku ima ia vondadi ki i kumu dingi.