Jisálamu 148 - O Mikanda Ikola

Diulu Ni Oxi I Ximane Jihova Ximanenu Jihova!

¹ Ximanenu Jihova ku maúlu; mu ximanienu ku matala.

² Mu ximanienu enu mu ji-anjo jê;

³ Mu ximanienu enu mu kumbi ni mbeje; Ximanenu enu mu jithéthembua ja kubenha.

⁴ Mu ximanienu, diulu dia madiulu, ni enu mu menha muala ku thandu dia diulu.

⁵ A ximane o dijina dia Jihova, kuma muene ua zuela ngó, iene ioso ia di bhange.

⁶ Iene ioso ua i te mu ididi iê, katé ku mbambe tulʼé! Anga i kalalà-ku muene katé ku hádia ni hádia, ua a xindila ijila, ka tena ku i somboka.

⁷ A ximane Jihova, tunde kiá mu ngongo, ni enu mu iama muʼalunga ni mu ididi ioso iazongo;

⁸ Túbhia ni matadi ma mvula, neve ni mbundu, kitembu kia kibhungu, iene ioso i kumbidila o kizuelu kiê.

⁹ Milundu ku mukáu, ni tuthuthulundu tuoso; miẋi ia ibundu, ni miẋi ia mixitu;

¹⁰ Mu iama, ni enu mu ibhaku, mu ibamba i zanzala bhoxi, ni enu mu jinjila mu bhita bhulu;

¹¹ Mu jisobha mu ngongo, mu madiembu moso mu jixi; mu jingana, ni enu mu afundixi ku mundu.

¹² Mu nzangi ia mala, ni enu mu anʼa ilumba, mu adiakimi, ni enu mu anʼandenge;

¹³ Ene oso Ximanenu o dijina dia Jihova; mukonda diene ngó o dijina dia a tundu ene oso; muene ngó Sukè-ku mu ngongo ni ku maulu.

¹⁴ Lumbinga lua povo iê ua lu bhana dingi nguzu, kia bhangesa akua kikutu kiê ku mu ximana; ene anʼê a Izalaiele, ene o mundu uê a mu zukama. Ximanenu Jihova!