Jisálamu 147 - O Mikanda Ikola

Diximanu dia Nzambi Uatena Ioso

¹ Ximanenu Jihova! kima kiambote o kuimba mù ximana Nzambi ietu; kiki-phe kia touala, kia fuama muene o kuximana.

² Jihova u tungisa dingi Jeluzaleme; hé u bhongolola akua Izalaiele a di muangene.

³ Akexe ni kikote kia muẋima u a saka, hé u a tumba o italákanha ia malamba mâ.

⁴ Jithéthembua muene u ji kuata o konda; u jʼixana joso muene mu majina mâ.

⁵ Ngana ietu u kôla, ua suína mu kukalakala; o kuijiia kuê ki kuene mbambe.

⁶ Jihova u zangeleka ió a di tululula; abhukumuka-phe u a tununa muene katé bhoxi.

⁷ Imbidienu Jihova ni kusakidila; xikenu o mbànza mu ximana Nzambi ietu.

⁸ Muene, muene ua vungina o diulu ni matuta, u iudika o mvula kunoka mu ngongo, u bhangesa iangu ia uisu kusabhuka ku milundu.

⁹ Kiama mu iangu muene u ki bhana o kúdia, ni anʼa ilombelombe kioso ki i dikola kua muene.

¹⁰ Nguzu ia kabalu ki iene i mu uabhela; o inama ia bhebhuluka ia diiala ki iene ia ximana.

¹¹ Ki uabhela Jihova athu a mu kala ni uôma uê, ni athu oso a dielela jihenda jê-muène.

¹² Ximana Jihova, eie u Izalaiele; ximana Nzambi ié, eie u Ziione.

¹³ Mukonda muene ua kolesa dingi o jitalanga ja mabhitu mé; anʼé moxi dié ua a bhana kuzediua.

¹⁴ Muene ua ku bhana o kutululuka katé kua suku o mbambe ié, muene ua ku bhana o kuikuta ni tiliku ia fina.

¹⁵ U tubhula o ngonge iê mu ngongo; kizuelu kiê kienda muene lusolo.

¹⁶ U lalumuna o neve kala lá, ia kindemba kia jimbudi; u kuua kikulakaji kala utókua.

¹⁷ U takujula matadi a mvula kala jimbundu; o ku mbàmbi iê, nanhi u tena kuimana-ku?

¹⁸ U tuma dingi kizuelu kiê, a sengumuka; kitembue kiê ki bhuka, menha mê ma kunguluka.

¹⁹ Uidikiza o maka mê kua Jakobo, ni ijila ni jiphangu jê kua Izalaiele.

²⁰ Kana-ku dingi mbutu iʼathu ua a bhange kiki; ki u a ebhula o jiphangu jê, ene ka jʼijiia. Ximanenu Jihova.