Jisálamu 146 - O Mikanda Ikola

O Kubhuila Kua Muthu Ni Ufiiele ua Nzambi

¹ Ximanenu Jihova! Eie ue u muenhu uami moxi, ximana Jihova!

² Katé bhuoso bhu ngà laiela, nuka ngà kamba kuximana Jihova; ngimba jinga o diximanu dia Nzambi iami, katé bhua kà ngi suka o muenhu uami.

³ Kana kudielela jingana mu ngongo, mba monʼa muthu ua lémbua kubhandulula, kuma ku monʼa muthu kana-ku kubhuluka kua kima.

⁴ Mukonda o anʼathu kubhuima kuâ kúbhua, ene anga a vutuka ku mavu; mu kizuua kienhókio, o ilunji ié ioso ia di boto.

⁵ U zediua o muthu ió kubhanduluka kuê kua mu kala kua Nzambi ia Jakobo, ua bhingi o muẋima uê ua dielela kua Jihova muene Nzambi iê.

⁶ Ua bhanga o diulu ni ixi, ni menha a kalunga, ni ima ioso iala-mu; mukua kukumbidila o kidi katé ku hádia ni hádia, sé kufula.

⁷ U bhesa kaxtiko mu bhângela ió a a bhikisa; hé u bhana kúdia kua ió a tate ni nzala, Jihova u jituna ió a a kuika;

⁸ Jihova u jikula o mesu a ifofo; Jihova u bhetula ió a zeka bhoxi; Jihova u zola ió aiuka.

⁹ Jihova u langa jinzuángiza; u tambula konda ia jihukunhi ni atudi; maji o njila-phe ia ísueia u i bhengeleka.

¹⁰ Jihova kà tunda dingi ku ungana uê; o Nzambi ié, u Ziione, u xalela ku miji ioso. Ximanenu Jihova!