Jisálamu 145 - O Mikanda Ikola

O Uthu Ni Unéne Ni Mbote Ia Nzambi

Diximanu dia Davidi.

¹ Nga ku zangeleka, eie u Nzambi, u Muenexi uami; ngi tumbula jinga o dijina dié, kutunda muiji kuiza muiji.

² Izuua ioso, Ngana, ngi ku tumbula, ngi ku ximana jinga o dijina dié, kutunda muiji kuiza muiji.

³ Jihova u kôla, ua tokala ku mu ximana kiavulu; o unéne uê kana muthu u tena ku u zubha ku u ijiia!

⁴ Muiji umoxi u tanga o ikalakalu ié, muiji uamukuá nʼa ijiie, ni undanda ué u uene mu kubhanga.

⁵ Hinu ungana ué ngi u tanga o fuma, ni ikalakalu ié ia madiuanu.

⁶ Ku kale athu a thatha o isuma ié i kuatesa uoma; eme ngi ta mukumbi kuma Nzambi ukôla.

⁷ A kà tanga musêndu ua mbote ié iavulu, hé emba o mukumbi ua kukumbidila kué.

⁸ Jihova ua lenduka, u bhanga o mbote, u kokoloka kutema, u vula kukuatela o henda.

⁹ Jihova ene oso u a bhanga muene mbote, ikalakalu iê ioso u i tambula konda mu henda iê.

¹⁰ Ikalakalu ié ioso i ku sakidila muene, eie u Jihova; o athu é a kazola a ku tumbula.

¹¹ A kà tumbula o fuma ia ungana ué, a kà ta maka a nguzu ié.

¹² Phala kufumanesa muaʼaxaxi ka anʼa athu o madiuanu mé ma uzonda, ni kuijidisa o fuma ni kuuabha kua utuminu ué.

¹³ Utuminu ué, utuminu uanangenena, o ukota ué u xalela ni ku miji ioso.

¹⁴ Jihova u balumuna oso a di bhale, hé u bhetula oso a zeka bhoxi.

¹⁵ Ko kué kuene kua te mesu ene oso-lolo; eie-phe u a bhana o kudia mu thembu iatokala.

¹⁶ Eie uila u jikula o lukuaku lué, mienhu ioso i dia, ikuta ni ima iambote.

¹⁷ Jihova mukua kidi mu njila jê joso, muene ukôla mu ikalakalu iê ioso.

¹⁸ Jihova ua zukama kua ió a dikola kua muene, oso a dikola kua muene mu kidi.

¹⁹ Muene u bhanga o vondadi ia ió oso a mu kala ni uoma; uívua nzongo iâ, ia kudikola, hé u a bhulula.

²⁰ O Jihova u langa oso a mu zola; iá-phe a bhukumuka hádia u a buikisa.

²¹ Dikanu diami di sakalala mu kuximana Jihova; o xitu ioso, kutunda muiji kuiza muiji, i ximane dijina diê dikola.