Jisálamu 144 - O Mikanda Ikola

Kusakidila Nzambi Mu kubhandulula Kuê

Mukumbi ua Davidi.

¹ A tane-ku! Jihova ditadi diami! kuma ua longo maku ami o kubhânga, ni milembu iami kúlua ita;

² mukua henda iami, kimbaka kiami kia ngi xitila, mbonge iami ia matala, kilolo kiami kia ku ngi bhângela; ngubu iami, nga mu dielela muene; muene ua tolola o mundu phala a ngi belesele.

³ Jihova, muthu muene ua soko kiebhi, phala eie u kale mu ku mu suua? o mona-muthu u mu tambula kiebhi o konda?

⁴ Kuma muthu muha, mukuâ ni kima kia ngoho; izuua iê i bhita kala kinzúnzumbia.

⁵ Bheteka o maúlu, u Jihova, u tuluke; babata milundu phala i fuafue dixi.

⁶ Telaka nzaji, u a muange; asa o misongo ié phala a diuane,

⁷ Sunununa o lukuaku lué tunde bhulu bhu uala, u ngi kuate, u ngi zaule mu menha masuina, u ngi tambule, bhu maku ma athu a mbutu iengi;

⁸ A bhingi dikanu diâ di zuela izala ioso; o kia leka lukuaku, lu kala lua makutu.

⁹ Hinu ngi ku imbila o muimbu uobhe, eie Ngana, u Nzambi; ngi ku xikila o mújika ku mbànza ia kuinhi dia ngoji, mu ku ku ximana.

¹⁰ Eie-muène u bhana o uzonda ku jisobha; eie u kudila selevende ié Davidi ku mukuale ua kiluami.

¹¹ Ngi kudile, u ngi tambule bhu maku a mbutu ia athu engi; a bhingi o dikanu diâ di zuela izala ioso, o kia leka lukuaku, lu kala lua makutu.

¹² Mbé anʼetu a mala, mu unzangala uâ, a kale kale mixi ióphaphe i kula lusolo tunde mu undenge uâ; o anʼetu a ahatu ue a kale kala matadi a kuatesa bhu thungi, a kala muene mukuâ ni jiphiladi jósete ja palaxu.

¹³ Mbé o inganja ietu izale ni huta ia mákudia a ídifua ioso, o ibhaku ietu ku mukáu, i sokoloke jimidi ni jimidi; o jimbudi jetu, ki ji kale isula.

¹⁴ Jingombe jetu ji kale ni nguzu ia kukalakala, ki bhu kale dingi o kimbaka ku ki bula, ki bhu kale kusalumuka bhu bhata, ni ma-kutunda-tunda, ki bhu kale dingi o kudikola-kola mu nzunga jetu.

¹⁵ Azediua o athu a kala mu ukalelu kala iú uala kiki; azediua muene o athu ala ni Jihova kuma Nzambi iâ.