Jisálamu 143 - O Mikanda Ikola

Kubhinga Nzambi Bhu Kíbhidi

¹ Ngʼivue musambu uami, eie u Jihova; bhetama dítui, u ngʼivue o kudikola kuami; u ngi vutuile mu kukumbidila kué ni kidi kié.

² Kana kufunda ni selevende ié; kuma ku mesu mé-eie muthu uebhi u tena kulunga?

³ Kuma nguma ia zuididika o muenhu uami, ua ngi xinina muene bhoxi, kala ngi muthu ngʼàfua ukulu.

⁴ Kala kiki, nzumbi iami ia xala mu kubhondalala, o muẋima moxi, ua ngi bhuuama!

⁵ Ngi lembalala o izuua ia xahulu, ngi xinganeka o ima i ua bhanga jinga; ngi banza o ufunu ua maku mé.

⁶ Ngi sunununa o maku mami ko kué, muenhu uami ua ku kala ni dinhota, kala mʼoxi iakukuta. (Selah.)

⁷ Endelà-ku, Ngana, mu ku ngʼitaia, kuma o nzumbi iami ia botomoka; kana ku ngi suekela o pholo ié, mbé ki ngi kale kala athu a mu kutuka mu kina.

⁸ Ngi bhangese kuivua o kulenduka kué mu kimene, kuma eie-muène nga ku dielela; ngʼidikize o njila ioso i nga tokala kuila, kuma o muenhu uami ua bhetukila ko kué.

⁹ Ngi kudile, u Jihova, ku jinguma jami, mukonda ko kué kuene ku ngi lengela mu ku di sueka.

¹⁰ Ngi longe kubhanga o vondadi ié, kuma eie-muène u Nzambi iami; o Nzumbi ié iambote a ngʼendese mu kididi kia sokelela.

¹¹ Ngi phaphumune, u Jihova, mukonda dia dijina dié; mukonda dia kuiuka kué, ngi katule o muenhu uami mu malamba.

¹² O mu kulenduka kué, enhó, o jinguma jami, a vuze muene nda a jime mbutu; buikisa, Ngana, oso a mu bhondeleka o muenhu uami, kuma eme ngi selevende ié.