Jisálamu 142 - O Mikanda Ikola

Musambu Ua Muthu Uabhondalala

Maxikile ma Davidi; Musambu uê ua sambe kiala mu dibànda.

¹ Nga suína dízui ni kudikola kua Jihova; ngi dionda, ngi diondolola kua Jihova, ki ngi dixibha.

² Nga lundulula muene o ku di tenda kuami bhu pholo iê; nga mu tangela muene o dilamba diami dioso.

³ Kioso o muẋima uami moxi ki ua ngi kala ni kubhondalala, eie-phe uejiia kiá njila ioso i nga tokala kuila, kuma mu njila i nga kuata, a ngi tela-mu mubhetu.

⁴ Nga talesa bhu mbandu iami ia madilu, kana-bhu dilemba; ku ngi lengela ki ku moneka; kana muthu kia mu kuatela kima, né muenhu uami ua di boto.

⁵ Nga dikola-phe ko kué, u Jihova, ngixi: Eie-muène u dilengelu diami; eie ngó u dibhandulukilu diami, kʼulu dia mundu kunu.

⁶ Ngi suue, Ngana, o kudikola kuami, kuma nga tunuka kiavulu. Ngi kudile kua ió ala ku ngi zuididika, kuma ene, eme a ngi tundu mu nguzu.

⁷ Ngi katule o muenhu uami mu kaleia, phala ngijiie kusakidila o dijina dié; athu aiuka a-ndu ngi bhongolokela; mukonda eie ua ngi bhange mbote.