Jisálamu 141 - O Mikanda Ikola

Musambu ua Ngoloxi Mukumbi ua Davidi.

¹ Jihova, tata, nga di kola ko kué; endelà-ku, Ngana, mu ku ngi sanga; bhetama u ngʼivue dízui, kioso ki ngi di tenda kokué.

² Musambu uami u bande ko kué, kala uasu ua dizumba; o makuʼami, kia sununuka, a kale kala sata ia ngoloxi.

³ Ngana, langidila o dikanu diami; uinge o muelu ua mizumbu iami.

⁴ Muẋima uami ki u zuame ku kima kiaiibha, ki ngi lalame ni imbamba ia kubhukumuka. Nguami kukaiela athu a kalakala ima iaiibha, o kúdia kuâ kua fina, eme ki ngi ku indi.

⁵ Uoso uaiukʼó, kia ngi beta, ngʼila kuma ua ngi bhange mbote; o kia ngi bazela, ki kala kala maji ma ngi uaie, ma ngi tula muene kiambote mu mútue; ió né a jijila uthu uengi, eme ngi kolokota ni kusamba.

⁶ O Jingungu ja ilamba se a a lundumuina bhu dikenhe, kiene kiua kievua o maka ami kuma a kidi.

⁷ Mukuâ ni ibhasu ia matadi ia di muangena mu kikoka, kiene ue ifuba ietu ia sekumuka ii ia di muangena bhu kanga, dia kina.

⁸ Mesu ami-phe ala ko kué, u Ngana, u Jihova; ko kué kuene ku nga dielela, muenhu uami ki u di bote.

⁹ Ngi kuate, Ngana, kuma a ngi tela mubhetu, akua kukalakala mangonha, a ngi lungila muene jingànda.

¹⁰ Abhukumuka a fue mu uanda ua te ene, eme ngi bhulake, ngi bhite muene.