Jisálamu 140 - O Mikanda Ikola

Ku Tu Langa Ku Jinguma Ni Athu A iibha

Ua Mesene ia Mujika. Mukumbi ua Davidi.

¹ Ngi kudile, u Jihova, ku muthu uaiibha; ngi tambule kua ió uala kiluami;

² oso a ta ikutu ia phulu ku mixima iâ, a di bhongolola jinga mu kúlua ita.

³ Dimi diâ a di zuika kala dia nhoka, kuema dia mizumbu iâ, kuala ikolakola kala ia madiuta. (Selah.)

⁴ Ngi bhake, u Jihova, maku a kisuéia ka ngi kuate; ngi xitile kua ió ua suína; a ngi kanena muene ku ngi bhana kibhalu.

⁵ Akua izala ió a ngi tela mabhebhe ni múkala; a ngi fika kúfua mu uanda ua mikolo ua ngi tela; a ngʼolekela mibhetu ku mbanduʼa njila.

⁶ Eme-phe nga ku ambela, Ngana, ngixi eie-muène u Nzambi iami; ngʼivue kioso ki ngi dikola ko kué, u Jihova.

⁷ U Jihova, Ngana iami, Mubhuludi, eie-muène ua ngi vungina o mútue mu kizuua kia ita.

⁸ Isuéia, Ngana, kana kubhanga o vondadi iâ; fudisa ikutu iâ, ki iie ku pholo, phala ka di te nzabala. (Selah.)

⁹ Ku mítue iâ ió oso a ngi kondo mu jimbandu, ku tule o phulu ioso iala ku mizumbu iâ.

¹⁰ A kuuile makala ma uama ku thandu diâ; a a vubule muene mu túbhia; a fue mu madiela ma zongo, phala ka tene dingi kutunda-mu.

¹¹ Muzuedi uaibhʼó, ka kale dingi ni kididi mu ngongo; mukua kusuína, uíndua u mu seia katé kia mu jikinisa.

¹² Ngejiia kuma Jihova u fundila jinga ió uoso a mu tatesa, u tetuluila ió uoso ua bhindama.

¹³ Sé kufula, oso aiuka a kà sakidila o dijina dié; o emana mixima nzanza, a kà tunga bhu pholo ié.