Jisálamu 139 - O Mikanda Ikola

Nzambi Uala Kuoso, Uejiia Ioso

Ua Mesene Ngimba. Mukumbi ua Davidi.

¹ U Jihova, eie ua ngi solokota, ua ngʼijiia.

² Ua ngʼijila ni kuxikama kuami ni kubalumuka, o ilunji iami ni mu kanga muná ia ku jimbulukila kiá.

³ Ua tungula uendelu uami ni uzekelu, jinjila jami joso ja di monekena ko kué.

⁴ Né ngó kizuelu kia ngi kala bhu dimi, eie-phe, u Jihova, ka ku dingila kima.

⁵ Ua ngi kondo ku pholo ni ku dima, eie ua ngi tula o lukuaku lué kuthandu.

⁶ Nga diuana kuijiia ku kala kiki! kua ngi tundu, ki ngi tena-bhu!

⁷ Ngi di tela kuebhi ku ngi xila o Nzumbi ié? mba, ngi lengela kuebhi, pholo ié ni i kambe ku ngi mona?

⁸ Se ngedi ngi banda ku diulu, eie kuene ku uala; ngi kutuke mu Bombo dia madifundu, eie ku kambe-mu.

⁹ Se ngi kuata mabhabha ma kimene, hé ma ngi bheka kua suku o musanza,

¹⁰ Né koko, lukuaku lué lua ngi bhiti ku pholo, o lué lua kúdia hanji lua ngi kuata.

¹¹ O ki ngʼila ngixi: Ngi di vunga usuku, ngi kala mu kitombe, kífua nga suama, bhenhobho usuku ua kà di bhanga kala muanha ku mbandu ni mbandu.

¹² Mukonda né usuku ki u xikina ku ngi sueka bhu pholo ié; ku mesu mé kua zele kala muanha; ni kuavundu ni kuazele kuene kuoso kua soko-é.

¹³ Eie-muène ua ngi bhanga mixima moxi; eie ua ngi tunga jixitu mu vumu dia mamʼetu.

¹⁴ Nga sakidila Ngana, kuma ki kôla ki ua ngi iudika, ki kuata uoma! Ikalakalu ié, Ngana, madiuanu! kia ngi tetulukila muene kiambote.

¹⁵ Ifuba iami eie kua kambele ku i mona, kioso ki ua ngi bhanga ufunu mu kasuekèdia, kioso ki ua ngi Sokejeka kala koxi a mavu ku ngala.

¹⁶ Mesu mé ma ngi mono mukutu uami, kioso ngó kiluua u di umba; o idiandu iami ua i soneka mu divulu dié, ni izuua iami i nga kà bhanga, kala kiluua ngó ngi i mateka.

¹⁷ Ilunji ié, u Nzambi, i ua ngi xinganeka na-iu, kima kia kulalula! se ngedi ngi i kuata konda, ki ngi i tena, kuma iavudilà-ku!

¹⁸ Ku i kuata mu kimoxi-kimoxi, kuvula kua kisekele ndenge; ngʼila ngi tunda mu kubhuuama, hanji ngala bhu ualʼeie.

¹⁹ Ki kôla Ngana! kisuéia hinu u mu jibha! Ngi tundidienu bhu mbandu iami, enu mu athu mua hamena o manhinga.

²⁰ Mukonda eie, Ngana, a mu ku lokalala; jinguma ji tumbula muene o dijina dié ni kubhuma.

²¹ Manhi ngi kamba ku a zemba, a ku zembe eie u Jihova? kífua ki kamba ku ngi iibhila kia ku bhukumukina eie Ngana?

²² Nga a zembe muene, ni kizembu kia tokala; nga a kita jinguma jami.

²³ Nzambi ngi solokote, u ngʼijiie muẋima moxi; ngi lole, u ngi tongolole o ilunji ioso;

²⁴ Ngi tangele, se ua ngi mono ngala kuila muengi; u ngi kutukise mu kikoka ki nangenena.