Jisálamu 135 - O Mikanda Ikola

Kuximana Ngana Nzambi

¹ Haleluia! Ximanenu Jihova, Ximanenu o dijina dia Jihova; mu ximanienu, enu mu jiselevende ja Jihova.

² Enu muemana mʼonzo ia Jihova, mu lumbu lua dizemba dia Nzambi ietu.

³ Ximanenu Jihova, kuma muene muthu uambote; imbenu diximanu dia dijina diê, kuma kima kiaiuka.

⁴ Mukonda Jihova ua solo Jakobo, nʼa kale muthu ua kazola kê, o Izalaiele uene o muiji ua undûndu uê uangene.

⁵ Kuma eme ngejiia kuila, Jihova u kôla; o Ngana ietu Nzambi, ua tundu o jinzambi joso.

⁶ Jihova ioso ia mu kexe mu vondadi iê, iene muene ia bhange, ni mu diulu ni mu ngongo, ni ku musanza, ni mu ididi ioso muazongo.

⁷ U bhangesa mbundu kutuka jinga ku maẋokololo a jixi; u bhangesa nzaji ienda ni mvula; u katula kitembu mu dibhakelu diê.

⁸ Muene ua beta anʼa phandekumbi mu Ijito, tunde ku athu katé ni ku ibhaku;

⁹ ua tubhula isuma ni madiuanu mó mué, u Ijito, ku thandu dia Falaó ni akua mbèle iê;

¹⁰ ua beta ilômbo ia miji iavulu, ua buidisa makota a jingana:

¹¹ ni Sihone sobha ia Mamodi, ni Hoke sobha ia Basane, ni jisobha joso ja Kanana.

¹² Jixi jâ iu ua ji bhana mu ubhinganu, ji kale undûndu ua mundu uê ua Izalaiele.

¹³ Eie, u Jihova dijina dié dikola, di nangenena kienhiki, katé ku hádia ni hádia! Eie, Ngana, a kala jinga mu ku ku banza ku miji ioso.

¹⁴ Kuma Jihova muene u fundisa o mundu uê; né ua luualela o selevende jê, u bhomba dingi o muẋima uê.

¹⁵ Iteka ia matumbu phalata ni ulu, ufunu ua maku ma athu.

¹⁶ Makanu iá, maji ki i tena kuzuela; mesu iá, maji ki i tena kumona;

¹⁷ Mátui sai, maji ki itena kuívua; kuma mu kanu diâ ki muala kubhuima kuoso-kuoso.

¹⁸ Oso a i iudika, ene uâ a soko-â na-iu; katé ni akuá oso a i dielela.

¹⁹ Enu dibhata dia Izalaiele, tanesenu Jihova; enu dibhata dia Alá, tanesenu Jihova;

²⁰ enu dibhata dia Levi, tanesenu Jihova; enu mu akua uoma ua Ngana, tanesenu Jihova.

²¹ Jihova a tane-ku, tunde mu Ziione, kuma muene ua tunga mu Jeluzaleme. Haleluia!